بالالار زارداپ شەككەن جول اپاتتارىنىڭ 70 پايىزىنا جۇرگىزۋشىلەر كىنالى

جىل باسىنان بەرى ەلوردادا بالالار زارداپ شەككەن جول اپاتتارىنىڭ 70 پايىزىنا جۇرگىزۋشىلەر كىنالى بولعان، دەپ حابارلايدى «قازاقپارات» استانا قالالىق ءىىد-گە سىلتەمە جاساپ.

بالالاردىڭ جول بويىندا جاراقات الۋىنىڭ الدىن الۋ ماقساتىندا جانە جازعى دەمالىستار قارساڭىندا 1 مامىر – 1 ماۋسىم ارالىعىندا استانادا «بالالاردىڭ جولداعى قاۋىپسىزدىگى» اتتى كەڭ اۋقىمدى رەسپۋبليكالىق اكتسيا وتكىزىلە باستادى. شارا بارىسىندا پوليتسيا قىزمەتكەرلەرى جاس قوزعالىس ينسپەكتورلارىمەن بىرگە مەكتەپ وقۋشىلارىنا جارىققا شاعىلىساتىن بىلەزىكتەر تابىستايدى. استانا قالاسى اكىمدىگىنىڭ «بالالار ءۇيى» مكك جانە «كامەلەت جاسقا تولماعانداردى بەيىمدەۋ ورتالىعى» مكك-ءنىڭ 60-قا جۋىق تاربيەلەنۋشىسى «قالا جولدارىنداعى وقيعا» سپەكتاكلىن تاماشالاي الادى.

سونداي-اق، اۆتوبۋستار مەن ايالدامارعا جۇرگىزۋشىلەردى جول ەرەجەلەرىن ساقتاۋعا شاقىراتىن بالالاردىڭ سالعان سۋرەتتەرى ىلىنەدى. ودان بولەك، قوعامدىق كولىك سالوندارىنداعى تەلەەكراندار مەن قالالىق كينوتەاترلاردان جولدا ءجۇرۋ ەرەجەسى تۋرالى الەۋمەتتىك روليكتەر كورسەتىلەدى.

«استانا قالاسىنىڭ ءىىد جەرگىلىكتى پوليتسيا قىزمەتى جول-كولىك جاراقاتتارىنىڭ الدىن الۋعا باعىتتالعان شارالاردى تۇراقتى تۇردە جۇرگىزىپ تۇرادى. ماقساتتى جۇمىس ناتيجەسىندە 2017 جىلدىڭ العاشقى 4 ايىندا ەلورداداعى جول-كولىك وقيعالارىنىڭ سانى 28،6 پايىزعا ازايدى، ونىڭ ىشىندە جول اپاتىنان قازا تاپقاندار سانى – 9 پايىزعا، جاراقات العاندار 23 پايىزعا تومەندەگەن. كامەلەت جاسقا تولماعان بالالاردىڭ قاتىسۋىمەن بولاتىن جول اپاتتارى 20 پايىزعا، زارداپ شەككەن بالالار سانى 16 پايىزعا ازايدى، قازا تاپقاندار جوق»، – دەلىنگەن ءىىد-ءنىڭ تاراتقان حابارلاماسىندا.

جۇرگىزىلگەن شارالارعا قاراماستان، جول-كولىك جاراقاتتارى ماسەلەسى وزەكتى كۇيىندە قالىپ وتىر. جىل باسىنان بەرى استانادا بالالاردىڭ قاتىسۋىمەن بولعان جول اپاتتارىنىڭ 70 پايىزىنا جۇرگىزۋشىلەر كىنالى بولعان، زارداپ شەككەن بالالار اۆتوكولىكتە جولاۋشى رەتىندە وتىرعان.

2017 جىل باستالعالى استانادا 5 مىڭعا جۋىق جاياۋ جۇرگىنشى رۇقسات ەتىلمەگەن جەردە جولدى كەسىپ وتكەنى ءۇشىن اكىمشىلىك جاۋاپكەرشىلىككە تارتىلدى.

 

 

ۇقساس جاڭالىقتار

Back to top button