Түркістан облысының Түлкібас ауданында туған анасын өлтірді деген күдікпен шамамен 40 жастағы ер адам қамауға алынды, деп хабарлайды turkystan.kz.
"Отырар" телеарнасының әлеуметтік желідегі парақшасында жарияланған мәліметке сәйкес, қайғылы жағдай аудандағы елді мекендердің бірінде болған. Алдын ала ақпарат бойынша, күдікті анасын өз үйінде пышақтап өлтірген.
Бейресми деректерде ер адамға церебралды сал ауруы диагнозы қойылғаны айтылады. Дегенмен құқық қорғау органдары күдіктінің денсаулық жағдайына қатысты ақпаратты ресми түрде растаған жоқ.
Қылмысқа не себеп болғаны әзірге белгісіз. Түркістан облыстық полиция департаменті оқиға дерегін растады.
Қазіргі уақытта күдікті қамауда отыр. Қылмыстық іс бойынша тергеу жүргізіліп, оқиғаның барлық мән-жайы анықталып жатыр.
