«Казцинк» компаниялар тобында жұмыс өндірісіне ерекше бақылау режимі енгізілді, министрліктермен бірлескен тәуекелдерді басқару жөніндегі жұмыс тобы жұмыс істейді және 11 мыңға жуық жұмыс орындарын тексеру жүргізілді, деп хабарлайды turkystan.kz.
Үкімет отырысында еңбекті қорғау жүйелерін жаңарту және бақылаудың жаңа құралдарын енгізу жөніндегі шаралар туралы компанияның бас директоры Жанат Жанботин баяндады.
Оның айтуынша, компания жыл сайын өнеркәсіптік қауіпсіздікке 27 млрд теңгеден астам инвестиция салады, бұл соңғы бес жылда өндірістік жарақаттану деңгейін 34%-ға төмендетуге мүмкіндік берді. Кәсіпорындарда нысандарды қашықтан бақылау және жерасты кеніштеріндегі қызметкерлердің орналасқан орнын анықтау жүйелері белсенді түрде енгізілуде.
«Компанияда қауіпсіздікті бақылаудың заманауи цифрлық құралдары енгізілген. Тәуекелдерді басқаруға, ауытқуларды бақылауға, қызметкерлерді оқытуға, тексерулер жүргізуге және түзету іс-шараларын орындауға мүмкіндік беретін OneAPP цифрлық жүйесі жұмыс істейді. Цифрландырудың негізгі элементтерінің бірі - қызметкерлер мен техниканы орналастыру жүйесі енгізілген жерасты кеніштері. Ол нақты уақыт режимінде жұмыскерлер мен өздігінен жүретін жабдықтардың қозғалысын көрсетеді. Қауіпсіздікті арттырудың қосымша құралы - соқтығысулар мен қауіпті жақындаулардың алдын алатын, өздігінен жүретін техникада орнатылған жүйе», — деді компанияның бас директоры.
