Алматы облысында жеңіл автокөлік жол жиегінде тұрған жүк көлігіне соқтығысты, деп хабарлайды turkystan.kz.
Әлеуметтік желілерде жол-көлік оқиғасының сәті түсірілген кадрлар мен оқиға орнынан түсірілген бейнежазбалар жарияланды.
Алматы облысы полиция департаментінің баспасөз қызметінің мәліметінше, апат Алматы – Бішкек автожолының 19-шақырымында болған.
«Алдын ала мәліметтер бойынша, 23 сәуір күні шамамен сағат 23:55-те Toyota Camry маркалы автокөліктің 27 жастағы жүргізушісі басқаруға ие бола алмай, жол жиегінде тұрған жүк көлігімен соқтығысқан. Жол-көлік оқиғасы салдарынан жеңіл автокөлік жүргізушісі түрлі жарақаттармен ауруханаға жеткізілді», – деп хабарлады полиция.
Аталған дерек бойынша қылмыстық іс қозғалды. Қазіргі уақытта оқиғаның мән-жайын толық, жан-жақты және объективті зерттеуге бағытталған барлық қажетті тергеу әрекеттері жүргізілуде.
Тергеу жалғасуда.
