Абай облысының Бородулиха ауданының прокуратурасы мемлекеттік жерлерді заңсыз иелену және орманды заңсыз кесу фактілерін анықтады, деп хабарлайды turkystan.kz.
Іле-Алатау мемлекеттік ұлттық табиғи паркі мен «Ертіс орманы» МОТР РММ-нің лауазымды тұлғалары заңды негіздерсіз Успенка және Поднебесное елді мекендерінің жайылымдық алқаптарына дайындалған ағаш материалдарын орналастырған.
Аталған жер учаскелері «Ертіс орманы» МОТР РММ-не пайдалануға берілмеген.
Жерді заңсыз пайдалану фактілері бойынша «Ертіс орманы» МОТР РММ-нің екі лауазымды тұлғасы әкімшілік жауаптылыққа тартылып, айыппұлдары төленді.
Сонымен қатар, Новошульба филиалының Успенка орманшылығында жалпы көлемі 96,7 м³ болатын «қарағай» тұқымдас 92 ағаштың заңсыз кесілуі анықталды. Келтірілген залал 760 мың теңгеден асты.
Аталған факт бойынша аудан прокуратурасы материалдарды АЕК-датіркеп, полиция органдарына жолдады, сотқа дейінгі тергеп-тексеру басталды.
Прокуратураның қадағалау актісі бойынша орман шаруашылығының лауазымды тұлғалары тәртіптік жауаптылыққа тартылды.
Жер пайдалану және қоршаған ортаны қорғау саласында заңдылықты қамтамасыз ету жөніндегі прокуратура органдарының жұмысы жалғасуда.
