Қазақстанда биылғы эпидемиологиялық маусым әдеттегіден ерте қыркүйек айының басында басталды, деп хабарлады денсаулық сақтау министрі Ақмарал Әлназарова.
Қазіргі уақытта респираторлық вирустық инфекцияның шамамен 2,6 миллион жағдайы тіркелді, бұл өткен жылғы көрсеткіштен 3%-ға жоғары.
Сонымен бірге, министрдің айтуынша, жағдай бірте-бірте тұрақтала бастады. Соңғы аптада сырқаттанушылық көрсеткіші 1,4 есеге төмендеген. Эпидемиологиялық маусым басталғалы тұмаудың 2562 жағдайы зертханалық түрде расталды, негізінен бұл "Гонконг тұмауы" деп аталатын A(H3N2) вирусы. Онымен қатар басқа да маусымдық респираторлық вирустар тіркелген.
Эпидемиологиялық жағдай оқу процесіне де әсер етті. Еліміздің 10 өңірінде 97 мектепте 317 сынып уақытша қашықтан оқуға көшті.
Жағдайға байланысты денсаулық сақтау жүйесі дайындықты күшейткен: алғашқы медициналық-санитарлық көмек деңгейінде 1143 мобильді топ жұмыс істейді, 1517 фильтр-кабинеттер ашылды, оның ішінде 638-і жүкті әйелдер мен балаларға арналған. Төтенше жағдайларға 684 жедел жәрдем бөлмесі дайындалды, 1057 байланыс орталығы халыққа консультативтік көмек көрсетеді.
Денсаулық сақтау министрлігі эпидемиологиялық жағдай тұрақты бақылауда екенін және қажетті шаралардың толық кешені қолға алынғанын атап өтті.
Ведомство вирустық инфекциялардың маусымдық өсуі кезінде негізгі профилактикалық шараларды – қол гигиенасын сақтау, бөлмелерді үнемі желдету, адам көп жиналатын орындарға баруды шектеу және аурудың алғашқы белгілері пайда болғанда дереу медициналық көмекке жүгіну ерекше маңызды екенін еске салады.
