Болгария астанасы София қаласында кадеттер арасында дзюдодан әлем чемпионаты мәресіне жетті.
Жарыстың соңғы күні қазақстандық Әділжан Жаудинов +90 кг салмақта қола жүлдені жеңіп алды.
Медаль үшін белдесуде Әділжан чехиялық Меличар Скодамен татамиге шықты.
Ә.Жаудинов жекпе-жек барысында екі вазариге қол жеткізіп, қарсыласын тізе бүктірді.
Осылайша, Қазақстан қоржынына бесінші медаль түсті.
Бұған дейін Ернұр Батырғали (60 кг) чемпион атанса, Мұхаммедәлі Жылқайдар (66 кг) күміс, Арман Мыса (50 кг) мен Ролан Қайырғали (66 кг) қола жүлдеге ие болған еді.
Чемпионат қорытындысы бойынша Қазақстан құрамасы жалпыкомандалық есепте 6-орынға табан тіреді.
