Оқу-ағарту министрлігі мектептерге барлық оқулықтың толық көлемде жіберілгенін хабарлады.
Ресми мәліметке сәйкес, 7, 8, 10 және 11-сыныптарға арналған оқулықтар қайта басылды. Ал бастауыш сыныптар үшін жаңа оқулықтар шығарылды.
"Төменгі сыныптардың оқу мазмұнын жаңартуға ерекше көңіл бөлініп отыр. Осы орайда 4-сыныпқа арналған "Орыс тілі" (қазақ тілінде оқытатын мектептер үшін), шет тілдері (ағылшын, неміс, француз), "Еңбекке баулу", "Бейнелеу өнері", "Цифрлық сауаттылық" және "Жаратылыстану" (қазақ және орыс тілдерінде) пәндерінен жаңа оқулықтар әзірленді. 3-сыныптар үшін ұйғыр және өзбек тілдерінде оқулықтар жарық көрді", - дейді министрлік мамандары.
Ал көру қабілеті бұзылған және нашар көретін оқушыларға арналған арнайы басылымдар шығарылды. Оның ішінде "Қазақ тілі" (1–3-сыныптар), "Жаратылыстану" (1–4-сыныптар), "Орыс тілі" (2–4-сыныптар), "Дүниетану" (2–3-сыныптар), сондай-ақ, "Химия" және "Биология" (7–10-сыныптар, қазақ және орыс тілдерінде) оқулықтары бар.
Бұдан бөлек, орта және жоғары буын үшін алгебра, геометрия, ағылшын тілі, физика, биология, химия, Қазақстан тарихы және көркем еңбек пәндері бойынша да жаңа басылымдар әзірленді.
