Қызылорда облысында зауытта ауыр жарақат алып, көру қабілетінен айырылған әйелге «Аралтұз» АҚ моральдық шығын ретінде 5 миллион теңге төлеуге міндеттелді, деп хабарлайды turkystan.kz.
Соттың мәліметінше, Жақсықылыш ауылының тұрғыны 2013 жылдан бері «Аралтұз» АҚ-ның тұз өңдеу цехында ораушы болып жұмыс істеген. 2021 жылы ол цех операторы қызметіне ауыстырылады.
2025 жылдың қаңтарында түнгі ауысым кезінде дүкен қоймасында операторды тұз тасымалдайтын жүк көтергіш қағып кеткен. Әйел ауыр жарақат алған. Оған бірнеше мәрте ота жасалып, салдарынан көру және қозғалу мүмкіндігінен айырылған. Қазір зардап шегушіге үнемі сырттан күтім қажет, беті мен көзіне шұғыл ота жасалуы керек.
«Жұмыс берушінің әрекетінен еңбекке қабілетсіз болып қалдым. Денсаулығымнан айырылып, психологиялық күйзеліске түстім. Екі кішкентай қызым бар. Сол себепті моральдық шығынды өтеуді сұраймын», — делінген талап арызда.
Сотта өндірістік қызметпен байланысты жазатайым оқиғаға қатысты арнайы тергеу актісі қаралды. Құжатқа сәйкес, жұмыс берушінің 100% кінәлі екені анықталған. Аталған факті бойынша Қылмыстық кодекстің 156-бабы 2-бөлігімен қылмыстық іс қозғалып, сотқа дейінгі тергеу амалдары жүріп жатыр.
АҚ өкілінің айтуынша, жайсыз оқиға абайсыздықтан орын алған, «Аралтұз» жәбірленушіге 850 мың теңге көлемінде материалдық көмек көрсетіп, алдағы оталарға жұмсалатын барлық шығынды өз мойнына алған.
Сот істі қарап, әйелдің психикалық және физикалық азап шеккенін, денсаулығына ауыр зиян келтірілгенін және қайталап ота қажет екенін ескере отырып, «Аралтұз» АҚ-ны моральдық шығын ретінде 5 миллион теңге төлеуге міндеттеді.
