Елордадағы «Астаналық» базары бір күнге заңгерлік көмек орталығына айналды. Мұнда әр адам өз сұрақтарына жауап таба алды – несие міндеттемелерін шешуден бастап мүгедектікті рәсімдеуге дейін. Астаналық қалалық филиал ұйымдастырған Құқықтық көмек күні «AMANAT» партиясының қазақстандықтардың құқықтары мен мүдделерін қорғауға бағытталған «Құқықтық көмек» және «Қарызсыз қоғам» сияқты ауқымды бастамаларының бір бөлігіне айналды.
Іс-шараның басты мақсаты – азаматтарға білікті заңгерлік және қаржылық көмекке қолжетімділік беру, сондай-ақ олардың қаржылық сауаттылығын арттыру болды. Күні бойы елуге жуық адам әртүрлі мәселелер бойынша тегін кеңес алды. Біреулер үшін тұрғын үй бағдарламаларының шарттары маңызды болса, енді бірі жеке кәсіпкерлікті жабу мәселелерімен жүгінді, ал кейбіреулер үшін міндетті әлеуметтік медициналық сақтандыру (ОСМС) арқылы медициналық көмек алу тақырыбы ерекше өзекті болды.
Заңгерлік және консультациялық көмекті Отбасы банкінің, «Қарызсыз қоғам» жобасының, Бірыңғай жинақтаушы зейнетақы қорының, Әділет департаментінің, адвокаттар алқасының өкілдері мен мәслихат депутаттары көрсетті.
«Өтініштердің ауқымы өте кең болды. Адамдарды мерзімі өткен несиелерден бастап жер рәсімдеу, банктердің жұмысы және денсаулық сақтау жүйесіне дейінгі түрлі мәселелер қызықтырды. Мұндай бастама халық арасында сұранысқа ие болып шықты, сондықтан осындай іс-шараларды елордадағы басқа да сауда үйлерінде өткізу жоспарланып отыр», – деді партияның елордалық филиалының атқарушы хатшысы Мұхаммед Болысбек.
Астана қаласы әкімдігінің коммуналдық тұрғын үй қорының кеңес беру және құжат айналымы бөлімінің басшысы Бекжан Сипат тұрғын үй мәселесі әлі күнге дейін көпшілік үшін ең өзекті тақырыптардың бірі екенін растады. Ол қазіргі уақытта кезекте тұрған азаматтар үшін жалға берілетін тұрғын үйді кейін сатып алу құқығымен алуға мүмкіндік беретін түрлі бағдарламалардың жұмыс істеп тұрғанын еске салды. Әсіресе, бұл көп балалы отбасылар мен әлеуметтік осал санаттағы азаматтарға қатысты.
Жеке сот орындаушысы Алмаз Арстанбек те маңызды мәселені көтерді. Ол көбінесе алимент және несие қарызы мәселелерімен жүгінетінін айтты. Оның сөзінше, көбіне адамдар несие рәсімдеген кезде шарттарын толық түсінбей, кейін қарызды кешіктіреді. Мұндай жағдайда банктер сотқа жүгінеді де, берешек өсіп кетеді. Алмаз мүлікті тәркілеу процедурасы басталмай тұрып, банктерге алдын ала барып, мәселені шешуге кеңес берді.
Іс-шараға қатысқандар арасында жалға берілетін тұрғын үй мәселесі бойынша арнайы кеңес алуға келген ер адам да болды. Ол қала маңында тұратынын, бірақ Астанаға қоныс аудару мүмкіндігін қарастырып жатқанын айтты. Азамат ұйымдастырушыларға барлық қажетті әрі сенімді ақпаратты бір жерден және артық ресмиліксіз алғаны үшін алғыс білдірді.
