Биыл жыл басынан бері Әлеуметтік қызметтер порталы арқылы мүгедектігі бар адамдардың 211,6 мың тапсырысы орындалған. Оның ішінде: шамамен 167,8 мың адам оңалтудың техникалық құралдарын (бұдан әрі – ОТҚ), 7,7 мың адам – ымдау тілі қызметін, 24,4 мың адам – жеке көмекшінің, 11,7 мың адам – санаторийлік-курорттық емдеу қызметін алған.
Портал мүгедектігі бар адамдарға оңалтудың техникалық құралдары мен қызметтерін өндірушіні және жеткізушіні өз бетінше таңдауға мүмкіндік береді. Көмек түріне тапсырыс беру көрсетілетін қызметті алушының электрондық цифрлық қолтаңбасымен растау арқылы жүзеге асырылады. Тапсырыс берілген оңалту техника құралдарын жеткізу немесе өз бетінше әкету арқылы алуға болады.
Мүгедектігі бар адамдарды оңалту құралдарына протездік-ортопедиялық, сурдотехникалық, тифлотехникалық және гигиеналық құралдар, сондай-ақ кресло-арбалар жатады.
Бүгінде порталда 703 арнаулы әлеуметтік қызмет көрсетуші, 979 ОТҚ жеткізушісі, 31 мыңнан астам жеке көмекші, 759 ымдау тілі және 129 санаторийлік-курорттық емдеу қызметтерін ұсынушы тіркелген.
Порталды пайдалану бойынша консультацияларды байланыс орталығынан, яғни 1414 бірыңғай нөмірі арқылы алуға болады.
