Армияның мықты болуы – ел тыныштығының кепілі. Сондықтан қай ел болса да қорғанысқа зор мән береді. Қазақстан Қарулы Күштері де соңғы жылдарда әскери әлеуетін нығайту үшін жұмыс істеп жатыр.
Өткен жылы Қаржы вице-министрі Абзал Бейсенбекұлы биылға арналған күштік құрылымдар үшін жұмсалатын қаржының бұрынғыдан 109 млрд теңгеге артық болатынын, оның көлемін 2,7 трлн теңгеге жеткізу көзделіп отырғанын айтқан еді. Бұл – Қорғаныс министрлігіне жалпы ішкі өнімнің 1,8 пайызы жұмсалады деген сөз.
Әрине, бөлінген қаражаттың көп бөлігі әскери техника сатып алуға жұмсалатыны белгілі. Өйткені техникасы мықты болмаса армияның қауқары артпайды. Бұл тұрғыдан алғанда, Қазақстанның Қорғаныс министрлігі өздеріне бөлінген қаржыны тиімді игеріп, 2022-2024 жылдар аралығында армиямызды күшейту мақсатында аса қажет көптеген әскери техниканы сатып алды.
Қазіргі кезде әскери дрондардың маңызы артқаны белгілі. Сондықтын мұны ескерген ел қорғанысына жауапты тұлғалардың шешімімен Түркиядан үш Anka-S үлгісіндегі ҰҰА сатып алынған. Бұдан басқа ел Қарулы Күштерінде Қытайда жасалған WingLoong-1, Израиль өнімі – Skylark-1LEX әскери дрондары бар.
Дрон жасау ісі елімізде де біртіндеп қолға алынып келеді. Мәселен, осыдан төрт жыл бұрын Ұлттық қорғаныс университеті «Шағала» барлау ұшқышсыз ұшу аппаратын жасап шығарды. Бұл отандық дрон белгіленген маршрут бойынша ұша отырып, жер бетіндегі объектілердің координаттарын анықтап, ақпараттарды операторларға беріп отыру қабілетіне ие. «Шағала» – 3 500 метр биіктікте сағатына 110 шақырым жылдамдықпен 30 шақырымға дейін ұша алады. Сонымен бірге Қазақстанда SUNQAR ұшқышсыз аппараты бар екенін де айта кеткен орынды.
Жаяу әскер үшін бронды машиналардың маңызы зор. Қазір біздің армиямыз қазақстандық Kazakhstan Paramount Engineering компаниясы шығарған Arlan брондалған машиналары мен Түркияның Отакар компаниясы шығарған COBRA II техникасымен жабдықталған. Атап айтсақ, Қазақстан Қарулы Күштеріне былтыр 53 Arlan бронемашинасы мен 45 Cobra II бронемашинасы берілген. Сондай-ақ Қорғаныс министрлігін еліміздің әскери бөлімшелерінде «Бук-М2Э» және «Тор-М2К» зениттік-зымыран кешендері, «Роса-РБ» және «Платформа» радиолокациялық стансалары және отандық «Нұр» радиолокациялық стансасы бар екенін айтты.
Қарулы Күштер үшін әскери ұшақтар да ауадай қажет. Сондықтан өткен жылы Қазақстан Қарулы Күштері Еуроодақтан Airbus А-400М әскери-көлік ұшағын сатып алды. Ол – 37 тонна жүкпен 3,3 мың шақырымға тоқтамай ұша алады. Қазір біз әлемде осындай әуе кемесіне ие тоғыз елдің біріміз.
Ел қорғанысы – мемлекеттің тірегі. Ол қорғаныстың күші заманауи әскери техникалар болса, бүгінде Қорғаныс министрлігі осыған ерекше назар аудару арқылы еліміздің әскери әлеуетін арттыруда.
