Абай облысында «Таза бейсенбі» акциясы жалғасып жатыр. Курчатов қаласында Жеңіс алаңының қары күрелді. Акцияға «AMANAT» партиясының өкілдері, қалалық мәслихат депутаттары және мемлекеттік қызметшілер, жастар қанатының еріктілері қатысты.
30-ға жуық адам қатысқан акция барысында 7 000 шаршы шақырым аумақтың қары күрелді. «Таза бейсенбі» акциясына өз еркімен қатысатын азаматтардың саны артып, студенттер де қолдау білдіруде. Өңірде бұл игі іс-шара әр аптаның бейсенбісінде тұрақты түрде өткізіліп отырады.
– Еліміздегі экологиялық жағдайды жақсартуға бағытталған акция аясында осыған дейін бірнеше көшелер мен аулаларды тазарттық, ардагерлерге құрмет көрсетіп, ескерткіштер маңын жинадық. Бұл жолы да ескерткіштер маңын тазалауды ұйғардық. Біз таза қала, таза экоголия үшін біргеміз, – дейді Курчатов қалалық Жастар ресурстық орталығының директоры Айжан Мұсатаева.
Ал Бородулиха және Жарма аудандарында мектептердің аумағы мен балалар саябағы қардан тазартылып, 40-тан астам белсенді қатысқан акцияда 5,5 тонна қар шығарылды.
– Бұл іс-шара ауданымызды көркейтуге және тұрғындардың өмір сапасын арттыруға үлкен үлес қосады. Экологиялық мәдениетті дамытып, таза әрі жайлы орта қалыптастыру – ортақ міндетіміз, – деді «AMANAT» партиясының Жарма аудандық бастауыш партия ұйымы тобының төрайымы Арайлым Каримжанова.
