Павлодар облысы Ақсу қаласында жаңа мәдени орталық пайда болды. Шаһарда «Кітап-AMANAT» кітап орталығы ашылып, әрбір азаматқа қазақ әдебиетінің бай мұрасымен танысуға мүмкіндік туды. Бұл орталық «AMANAT» партиясының қолдауымен іске қосылып, қала өміріндегі маңызды жаңалықтардың біріне айналды.
Жуырда «AQSU MALL» сауда-ойын-сауық орталығында «Кітап-AMANAT» орталығының салтанатты ашылуы өтті. Бұл еліміздегі осындай 24-орталық. Ақсуда бұл бастама Павлодар облыстық мәслихатының депутаты, «AMANAT» партиясы фракциясының мүшесі Александр Толмачевтің қолдауымен жүзеге асты.
Ашылу рәсіміне «AMANAT» партиясының хатшысы Шолпан Каринова, Павлодар облыстық филиалының төрағасы Илья Теренченко, облыстық филиалдың атқарушы хатшысы міндетін атқарушы Айнұр Мұхамедиярова, облыстық мәслихат депутаттары, сондай-ақ Ақсу қалалық ардагерлер кеңесінің төрағасы Залмұхан Арынов қатысты.
Шолпан Каринованың айтуынша, орталықтың басты ерекшелігі – оның халық көп шоғырланатын орында орналасуы. Бұл кітап пен оқу мәдениетіне деген қызығушылықты арттырып, оларды қала тұрғындарының күнделікті өмірінің ажырамас бөлігіне айналдыруға мүмкіндік береді.
«Ақсуда «Кітап-AMANAT» орталығының ашылуы – оқу мәдениетін дамыту мен отандық авторларды қолдаудағы маңызды қадам. Мемлекет басшысы Қасым-Жомарт Тоқаев кітап шығару ісін идеологиялық жұмыстың басты бағыттарының бірі ретінде атап өтті. Жазушылар мен ақындардың шығармалары оқырманға қолжетімді болып, әсіресе жастар арасында сұранысқа ие болуы қажет. Бұл орталық ұлттық әдебиеттің құндылығын сезінуге мүмкіндік беріп, интеллектуалды ұлт қалыптастыруға үлес қосады», – деді ол.
Орталықтың ашылуына жастар да айтарлықтай үлес қосты. Оның дизайнын Toraighyrov University студенті әзірлеген. Бұл жас мамандардың қоғамдық бастамаларға белсенді атсалысып, өңірдің мәдени кеңістігін дамытудағы рөлін айқындай түседі.
Айта кетейік, «AMANAT» партиясы 2023 жылдың қыркүйек айында іске қосқан «Кітап-AMANAT» жобасы еліміз бойынша қарқынды дамып келеді. Бүгінде Қазақстанның республикалық, облыстық және аудандық маңызы бар қалаларында 20-дан астам орталық жұмыс істейді. Тек 2025 жылдың алғашқы тоқсанында кітап қоры 14,7 мың данаға толығып, 700-ге жуық іс-шара өткізіліп, жалпы 14 мыңнан астам адам қамтылды.
Сондай-ақ «AMANAT» партиясы мен Баспа, полиграфия және кітап саудасы қауымдастығы өзара ынтымақтастық жөнінде меморандумға қол қойды. Құжат аясында баспалар «Кітап-AMANAT» орталықтарын қажетті кітап қорымен барынша қолжетімді бағамен қамтамасыз етеді.
