II Республикалық инклюзивті спорт фестивалі «Тең мүмкіндіктер» ерекше қажеттіліктері бар балалар үшін 2025 жылдың күзіне жоспарланған. Өңірлік іріктеу кезеңдері қазан айында өтеді, ал республикалық финал қарашада Астанада ұйымдастырылады. Іс-шараға дайындық барысы «AMANAT» партиясының Әйелдер қанаты мүшелерінің министрліктермен және қоғамдық ұйым өкілдерімен өткен жұмыс кеңесінде талқыланды.
Мәжіліс депутаты, «AMANAT» партиясы фракциясының мүшесі Наталья Дементьева бұл фестивальды дәстүрлі спорттық жарыстармен шатастыруға болмайтынын атап өтті.
«Біз жеңімпаздарды анықтауды мақсат етпейміз. Біз ерекше балалар өздерін қоғамда қолайлы ортаны құруды көздейміз. Олардың көпшілігі алғаш рет осындай ауқымды іс-шараға қатысып, өз қатарластарымен бірге спорт алаңына шығып, өмірдің қуанышын сезінеді. Ондағы бірнеше сағат – баланың өзін өзгелерге қажет екенін, қабілетті, мықты әрі сұранысқа ие екенін сезінетін уақыты. Егер біз осыған қол жеткізе алсақ, еңбегіміздің зая кетпегені», – деді ол.
Өткір мәселелердің бірі туралы «Тең мүмкіндіктер әлемі» қоғамдық қорының директоры Нұргүл Ұлжекова да сөз қозғады. Оның айтуынша, ауыр диагнозы бар балалар фестивальге ата-анасының еріп жүруінсіз бара алмайды. Алайда заңнамада ата-аналардың бұл сапары іссапар ретінде қарастырылмайды, сондықтан мектеп олардың шығындарын өтемейді.
«Біз нормативтік-құқықтық базаның шынайы өмірді ескермейтінін жиі байқаймыз. Ата-аналарға жолақы, тамақтану, тұру шығындары өтелмейді. Соның салдарынан өңірлік кезеңде жеңіске жеткен бала республикалық финалға бара алмайды, өйткені анасы бұл шығынды өзі көтере алмайды. Бұл жай ғана әділетсіздік емес – бұл ынтаны жоятын тосқауыл. Заңда еріп жүретін адамдардың қатысуы қарастырылуға тиіс. Біздің фестиваль осындай өзгерістерге түрткі болады деп сенемін», – деді ол.
«AMANAT» партиясының Саяси жұмыс департаменті директорының орынбасары Гүлнар Нұрахметханова фестивальді ұйымдастырудың бірыңғай құрылымын қалыптастыруды ұсынды.
«Біз өңірлерде іріктеу кезеңдерін өткізіп, үздіктерді республикалық финалға шақыруды ұсынамыз. Бұл өңірлерге жүктемені азайтады және жұмыс барысын жеңіл әрі түсінікті етеді. Бірақ бірыңғай алгоритм әзірлеу маңызды. Өткен жылы әр өңірде қолдау көрсетудің шарттары мен сомалары әртүрлі болды – бұл әділетсіздік. Біз барлық қатысушыларға тең мүмкіндік бергіміз келеді», – деді ол.
«Тең мүмкіндіктер» фестивалі «AMANAT» партиясының Әйелдер қанатының бастамасымен «Кедергісіз келешек» жобасы аясында ҚР Оқу-ағарту министрлігі, Қазақстандық бочча федерациясы, Ұлттық ғылыми-тәжірибелік дене тәрбиесі орталығы және басқа да ұйымдармен бірлесіп өткізіледі. Өткен жылы фестиваль еліміздің 18 өңірінде ұйымдастырылып, 1800-ге жуық баланы қамтыды, олардың үштен бірі ерекше қажеттіліктері бар балалар болды.
Айта кету керек, ерекше қажеттіліктері бар азаматтарды қолдау – «AMANAT» партиясының басты басымдықтарының бірі. Тек осы жылы ғана партияның көмегімен 46 инклюзияны қолдау кабинеті мен 661 бейімделген спорт секциясы ашылып, 5000-ға жуық бала қамтылды. Еліміздің барлық өңірлерінде мүмкіндігі шектеулі азаматтарды жұмыспен қамтуға арналған 300-ден астам бос жұмыс орындары жәрмеңкесі ұйымдастырылып, нәтижесінде 1600-ге жуық адам тұрақты жұмыс тапты. Бұдан бөлек, «AMANAT» қоғамдық қабылдау бөлмелерінде ерекше қажеттіліктері бар адамдар үшін 400-ден астам тақырыптық қабылдау өткізіліп, әлеуметтік инфрақұрылым нысандарын бейімдеу және мониторинг жүргізу мақсатында 684 рейд ұйымдастырылды.
