Елдегі ірі тау-кен металлургия компанияларының бірі спортты дамытуға және қазақстандық спортшылардың жарыстарға қатысуына 1,25 миллиард теңге бөлмек, деп хабарлады turkystan.kz.
Осыған байланысты тиісті құжатқа «Қазцинк» ЖШС басшылығы мен Қазақстан Ұлттық Олимпиадалық комитеті арасында қол қойылды.
«Дене мәдениетін дамыту – біздің компанияның әлеуметтік саясатының ажырамас бөлігі.
Біз спорттық бастамаларды, балалар мен жасөспірімдерге арналған спорт мектептерін белсенді түрде қолдаймыз, сондықтан Қазақстандағы олимпиадалық қозғалысқа да көмектесуге қуаныштымыз. Бұл отандық спортшылардың дамуына зор серпін беретініне сенімдімін», – деп атап өтті «Қазцинк» ЖШС бас директоры Жанат Жанботин.
Компания бөлген қаражат тиісті спорт федерацияларына бағытталып, басымдыққа ие олимпиадалық спорт түрлерімен қатар, болашақта әлеуеті жоғары спорт салаларын да қамтитын болады.
«Спортты дамыту сенімді әрі мықты серіктестерсіз мүмкін емес. Олар олимпиадалық қозғалыстың құндылықтарын бөлісіп, қолдау көрсетеді. «Қазцинкке» спортты дамытуға қосқан үлесі үшін алғысымызды білдіреміз. Біздің әріптестігіміз ортақ мақсаттарға жетуге бағытталған тиімді серіктестіктің үлгісі боларына сенемін», – деп мәлімдеді Қазақстан ҰОК президенті Геннадий Головкин.
