Ақмола облысының әкімшілік-аумақтық құрылымына өзгерістер енгізу туралы ұсыныс «Ашық НҚА» порталында жарияланды.
Ақмола облысы әкімдігінің қаулысы мен облыстық мәслихаттың «Ақмола облысының әкімшілік-аумақтық құрылымын өзгерту туралы» бірлескен шешіміне сәйкес, бірнеше ауылды басқа елді мекендер санатына жатқызып, есептік деректерден шығару көзделген. Таратылатын ауылдар:
- Ақбейіт (Астрахан ауданы);
- Жолбасшы (Ерейментау ауданы);
- Үлгіалған, Қарағай, Жаңатуған, Федосеевка, Ынталы (Бурабай ауданы);
- Еруслановка, Ұлтуған, Добровольное, Красносельское, Балуан Шолақ, Пушкин (Бұланды ауданы);
- Чашке (Сандықтау ауданы).
Одан бөлек өңірдің кейбір ауданында әкімшілік-аумақтық өзгерістер жоспарланып отыр. Атап айтқанда, Целиноград ауданының Қызылсуат ауылдық округі шегінде жаңа ауыл құрылып, оған «Нұрлы» атауы беріледі. Егіндікөл ауданының Спиридоновка және Абай ауылдарын біріктіріп, Спиридоновский ауылдық округі құрылып, оның орталығы Спиридоновка ауылы болады.
Бұланды ауданының Айнакөл ауылдық округі таратылып, Айнакөл және Острогорка ауылдары Журавлев ауылдық округінің әкімшілік-аумақтық қарамағына беріледі. Сондай-ақ, Біржан сал ауданының Валиханов ауылдық округіне қарасты Ақсу ауылы таратылып, Валиханово ауылына қосылады. Ақкөл ауданының Жалғызқарағай ауылдық округіне қарасты Қайнар ауылы да таратылып, Жалғызқарағай ауылына біріктіріледі. Ақкөл қаласына қарасты Ерназар ауылының әкімшілік бағыныстылығы өзгертіліп, Урюпин ауылдық округіне беріледі.
Аршалы ауданындағы Жібек жолы ауылына кент мәртебесі беріліп, Жібек жолы ауылдық округінің құрамынан шығарылып, округ орталығы Жалтыркөл ауылы болып белгіленеді.
Құжат жобасы биыл 17 сәуірге дейін қоғамдық талқылауға ұсынылып отыр, ал 2025 жылғы маусымда іске асыру жоспарланған.
