Жезқазған қалалық сотында желілерді пайдаланыла отырып, терроризмдi насихаттау, сол сияқты көрсетілген мазмұндағы материалдарды тарату мақсатында сақтау және тарату бойынша сотқа берілген «Б.»-ға қатысты қылмыстық іс қаралды.
Сотта анықталғаны:
Сотталушы «Б.» 2017 жыл мен 2018 жыл аралығында Сирия Араб Республикасында бола тұра, «Telegram» месенджері бойынша ойдан шығарылған аккаунт арқылы Ұлытау облысы, Сәтбаев қаласында тұратын жақын туысқанымен хат алмасып, терроризмді насихаттаған, ұялы телефонында терроризмді насихаттау белгілері бар радикалды діни материалдарды тарату мақсатында сақтаған, таратқан.
Тараптардың ұстанымы:
Прокурор сотталушыны тағылған айып бойынша кінәлі деп танып, оған 7 жылға бас бостандығынан айыру жазасын тағайындауды сұрады.
Сотталушы тағылған айып бойынша кінәсін толық мойындап, жасаған әрекеттеріне шын ниетпен өкінетіндігін көрсетті, оған қатысты жазаны жеңілдетіп, бас бостандығынан айырмауды сұрады.
Жазалау себептері мен сот шешімі:
ҚК-нің 256-б. 2-б. бойынша қылмыстық құқық бұзушылықтар ауыр санаттағы қылмыстар санатына жатады және оның санкциясында мүлкі тәркіленіп, 7 жылдан 12 жылға дейiнгi мерзiмге бас бостандығынан айыру жазасы көзделген.
Сот талқылауы барысында сотталушының кінәсі сотқа ұсынылған дәлелдемелердің жиынтығымен дәлелденді.
Жезқазған қалалық сотының үкімімен «Б.» ҚК-нің 256-б. 2-б. бойынша кінәлі деп танылып, оған 7 жыл мерзімге бас бостандығынан айыру жазасы тағайындалды, жазаны қылмыстық-атқару жүйесінің орташа қауіпсіз мекемесінде белгіленді.
Сот жаза тағайындау барысында жасалған қылмыстық құқық бұзушылықтың сипаты мен қоғамға қауіптілік дәрежесін, оның қоғамдық қауiпсiздiкке және қоғамдық тәртiпке қарсы бағытталғандығын, сотталушының жеке басына қатысты мәліметтерді, оның қылмыстық жауаптылығы мен жазасын жеңілдететін мән жайларды, ауырлататын мән-жайлардың жоқ екенін, ҚК-нің 256-б. 2-б. санкциясында баламасыз жаза көзделгендігін ескерді.
Сотталғанның кәмелетке толмаған балаларына қамқорлық белгілеу сұрағын шешу қамқоршылық және қорғаншылық органына берілді.
