Әлеуметтік желіде «Таразда балға ұстаған маньяк кезіп жүр» деген ақпарат тарады. Тұрғындар арасында үрей тудырған хабарламадан соң, құзырлы орган мәлімдеме жасады, деп хабарлады turkystan.kz.
1 сәуірде қалалық саябақ маңынан басы жаншылған ер адамның мәйіті табылды. Аталған жағдайдан соң, мессенджерлерде қорқынышты хабарлама тарай бастаған.
«Әлеуметтік желіде «Таразда балға ұстаған маньяк жүр, құрбан болғандар бар» деген ақпарат тарап жатыр. Жамбыл облыстық полиция департаменті аталған ақпарат шындыққа жанаспайтынын хабарлайды. Облыс орталығындағы шағын аудандардың бірінен ер адамның мәйітінің табылуына қатысты қылмыстық іс тергеліп жатыр», – делінген мәлімдемеде.
Департамент қазіргі уақытта күдіктіні анықтау және ұстау үшін қажетті тергеу-жедел шаралардың толық кешені жүргізіліп жатқанын айтты. Тергеу барысы полиция департаменті басшылығының бақылауында.
