Қарағанды облысының әкімі Ермағанбет Бөлекпаевтың тапсырмасы бойынша кәмелетке толмағандардың істері және олардың құқықтарын қорғау жөніндегі комиссияның жоспардан тыс отырысы өтті. Кеңесте Теміртаудағы жасөспірімдердің зейнеткерді ұрып-соғу оқиғасының мән-жайы мен себептері талқыланды.
Комиссия отырысын облыс әкімінің орынбасары Әлібек Әлденей өткізді. Жағдай туралы баяндамалар тыңдалып, ұсыныстар айтылды. Полиция тергеу жүргізуде.
– Бүгін комиссия жұмысына оның барлық мүшелері, басқармалар мен департаменттердің басшылары, әкімдердің орынбасарлары, сондай-ақ аудандық және қалалық комиссиялардың мүшелері қатысуда. Біз Теміртаудағы оқиғаның себептерін анықтағымыз келеді. Шешім шығарып, профилактикалық жұмысты жетілдіру жолдарын анықтау үшін жиналдық, – деді Әлібек Әлденей.
Облыста тұтастай алғанда девиантты мінез-құлықты жасөспірімдермен жұмысты күшейту қажет.
«Біз жасөспірімдер агрессиясына ерекше алаңдаймыз және болашақта осындай оқыс оқиғаларды азайту бойынша қосымша шаралар әзірлеуге кірісеміз. Барлық кінәлілер қолданыстағы заңнама шеңберінде жауапкершілікке тартылады. Сондай-ақ ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұраймын. Біз өз тарапымыздан жасөспірімдерді әлеуметтік қолдау мен алдын алу шараларын күшейту жұмыстарын жалғастырамыз», – деп жазды Ермағанбет Бөлекпаев Facebook-та.
Кәмелетке толмағандарға тиісінше бақылау жасамағаны үшін Теміртау әкімінің орынбасары Самат Зияшев қатаң сөгіс алды. Сондай-ақ, жасөспірімдер оқыған білім беру мекемелері директорларының орынбасарлары тәртіптік жауапкершілікке тартылды.
«Шаңырақ» орталығының еріктілері зардап шеккен зейнеткердің үйінде болды. Жалпы, еріктілердің фронт-кеңсесі жалғыз басты қарттарға қамқорлықты күшейтеді.
