Теміртау қаласының 27 жастағы тұрғыны сот шешімімен екі айға қамауға алынды
Теміртауда автобус аялдамасында адам өлтіру оқиғасы бойынша 27 жастағы күдікті қамауға алынды, деп хабарлады turkystan.kz КТК телеарнасына сілтеме жасап.
Қанды оқиға Қарағанды – Теміртау бағытындағы автобуста басталған. 44 жастағы Олег Ходченко жұмыстан қайтып келе жатып, автобустағы жолаушыларға балағат сөздер айтқаны үшін ескерту жасаған. Куәгерлердің айтуынша, әлгі жолаушылар мас болған.
Ходченко өз аялдамасында түскен кезде, екі ер адам оның соңынан жүгіріп барып, орталық даңғылда шабуыл жасаған. Күдікті қарсыласын 10 рет пышақтап, оқиға орнында ұсталды.
Теміртау қаласының 27 жастағы тұрғыны сот шешімімен екі айға қамауға алынды. Екінші күдікті де тергеуге алынып, оның қылмысқа қатыстылығы тексеріліп жатыр.
