Астана қаласында өткен “Мал ұрлығы” жедел алдын алу іс-шарасы барысында криминалдық полиция қызметкерлері тиісті рұқсат құжаттары жоқ, антисанитариялық жағдайда жұмыс істеген жасырын ет цехын анықтады, деп хабарлайды turkystan.kz.
Тексеру барысында екі құқық бұзушының жалға алынған екі гаражды заңсыз цех ретінде пайдаланып келгені белгілі болды. Жерасты өндірісінде 34 және 22 жастағы екі ер адам жұмыс істеген. Олар ешқандай ілеспе құжатсыз сатып алынған етті өңдеп, дайын өнімді жинақтап, қаладағы дүкендер мен ойын-сауық орындарына жеткізіп отырған.
Полиция қызметкерлері Ветеринариялық бақылау және қадағалау комитетімен бірлесіп, цехтан 176 ұсақ мал мен 7 ірі қара малдың сойылған етін, сондай-ақ ет өнімдерінің қалдықтарын сараптамаға алды.
Қазіргі таңда тексеріс жүргізіліп жатыр. Заңсыз кәсіптің ұйымдастырушыларына қатысты әкімшілік хаттама толтырылды.
Полиция тұрғындарды ветеринариялық бақылаудан өтпеген ет өнімдері қылмыстық жолмен алынуы мүмкін екенін және олардың адам денсаулығына қауіп төндіретінін ескертеді.
