Талдықорғанда көпқабатты үйдің терезесінде тұрған бала жұртты шошытты
Оқиға орнына келген құтқарушылар баланы терезеден түсіріп алды
Талдықорғанда куәгерлер қорқынышты сәтті видеоға түсіріп алды. Бесінші қабаттағы пәтердің терезесінде кішкентай бала тұрған.
Куәгерлер бала туралы құтқарушыларға хабар беріп, олар келгенше өздері құтқару әрекетін ұйымдастырды. Бала құлап кеткен жағдайда оны қағып алу үшін, бірнеше ер адам матрасты жайып, оны терезенің астында ұстап тұрды.
Трагедияның алдын алуға мүмкіндік туды. Оқиға орнына келген құтқарушылар баланы терезеден түсіріп алды.
“112 пультіне Талдықорған қаласындағы Самал шағынауданындағы бесінші қабаттағы пәтерде қараусыз қалған екі баланың терезеден құлап кету қаупі бар екендігі туралы хабарлама түсті. Төтенше жағдай қызметтері келген кезде, пәтердің есігін үй иесі ашты. Бір баланы Төтенше медицина орталығының қызметкерлері терезенің сыртқы ернеуінен түсіріп алды, екінші бала пәтер ішінде болды. Құрбандар мен зардап шеккендер жоқ”, – деп хабарлады Жетісу облысының ТЖД.
