Қостанай облысында есірткіні орманда жасырған әйел ұсталды

Қостанай облысында есірткіні орманда жасырып, сатумен айналысқан күдікті әйел ұсталды.

Қостанай облысында полиция Қостанай-Садовое тас жолының бірінші шақырымындағы демалыс аймағында аса ірі мөлшерде есірткі жасырған 27 жастағы әйел ұсталды.

Ұсталған әйелдің тұрақты жұмыс орны болмаған және есірткіге тәуелді екені анықталды. Жеке тінту барысында одан ақ жабысқақ таспамен оралған 14 бума есірткі тәркіленді.

Сонымен қатар жалдамалы пәтерді тінту барысында 44 бума есірткі, бос zip-пакеттер, 4 жабысқақ таспа орамы және электрондық таразы табылып, тәркіленді. Сараптама қорытындысына сәйкес, тәркіленген заттардың жалпы салмағы 33 граммды құрайтын мефедрон және «альфа PVP» синтетикалық препараттары екені анықталды,  – делінген хабарламада.

Күдіктіге қатысты қамауға алу түріндегі бұлтартпау шарасы қолданылып, полиция сотқа дейінгі тергеп-тексеру жүргізіп жатыр. Жедел-тергеу іс-шаралары жалғасып жатыр.