Кеше, 7 ақпанда Ақтауда әуе апатынан қаза тапқандарды еске алу кеші өтті. Оған 200-ден астам адам жиналды: қаза болғандардың жақындары, құтқарушылар, дәрігерлер және жергілікті билік өкілдері.
Бұл кеш тек естелік шарасы емес, сонымен қатар апаттан кейінгі ең қиын сәттерде көмек көрсеткен адамдарға алғыс айту күні болды. Қаза тапқандардың отбасыларына қолдау көрсету мақсатында Buta Group әзербайжан-қазақстандық компаниясы өз тұрғын үй кешендерінен оларға пәтер кілттерін табыстады.
Көмек қаза тапқандардың отбасыларына ғана емес, алғашқы минуттардан бастап қаншама адамның өмірін құтқарған жандарға да көрсетілді. Төтенше жағдайлар қызметкеріне, жедел жәрдем дәрігеріне және облыстық аурухананың қызметкеріне – апат орнына алғашқылардың бірі болып жетіп, зардап шеккендер үшін аянбай күрескен азаматтарға автокөліктер табысталды.
Кездесу барысында қаза тапқандардың есімдері мен олардың өмірі баяндалған деректі фильм көрсетілді. Бұл сәт тек қайғылы оқиғаны еске түсіру емес, сонымен бірге адамдардың есімі олардың құрметіне жасалған игі істер арқылы мәңгі сақталатынын білдіретін терең мағынаға ие болды.
Айта кетейік, 2024 жылдың 25 желтоқсанында Қазақстан мен Әзербайжан үшін ауыр оқиға болды. Баку – Грозный бағыты бойынша ұшқан Embraer E190 ұшағы Ақтауға шұғыл қону кезінде апатқа ұшырады. Әуе кемесінде 67 адам болған, олардың 38-і қаза тапты.
