«Қосуға дайынбыз»: Нұрғали Нүсіпжанов Мейрамбек Бесбаевқа бата берді

Қазақстанның Халық әртісі, әнші Нұрғали Нүсіпжанов Мейрамбек Бесбаевтың «AspanFM» радиосында қонақта болып, оған ақ батасын берді.

«Үлкен бейбіт шаруа бастап жатырсың. Осы көк аспаның аман болсын, осы көк аспаныңның қызығын көруге, марапатын алуға Алла нәсіп етсін. Қай жерде жүрсек те, сенің сөзіңді сөйлеуге, шығарып жатқан дүниеңе ой-пікірімізді қосуға дайынбыз», - деді Нүсіпжанов.

Мейрамбек Бесбаев бұл кездесуден желіде видео жариялап, жазба қалдырды.

«Бүгін Аспан ФМ радиосына қазақ ән өнерінің атасы, дархан даламызды тамаша дауысымен тербеп жүрген Нұрғали көкеміз келді. 88-ге келген жасында тынбай еңбек етіп, ұлылардан арқалап қалған аманатқа адалдық танытып келеді. 70 жыл бойы сахнаның сәні болып жүру екінің біріне бұйырмайтын бақ. Өнерге берері мол ақсақалдардың алдымызда аман жүргені бір ғанибет. Батасын беріп бақытымызды тілеп жүрген Нұрғали көкем аман болсын», - деп жазды ол.