Шымкентте сөмкесіне қару салып жүретін жасөспірімдер көбейіп барады. Ай басында қалада қару асынған колледж студенттері ұсталса, енді тапаншаны оқушылар да серік ете бастапты. Шымкент қалалық ішкі істер басқарамасының инспекторлары №39 мектептің 9 сынып оқушысын тапанша алып жүрген жерінен ұстап алды. Қазіргі таңда жасөспірімнен тәркіленген тапаншаға сот-баллистикалық сараптама тағайындалды. Тергеушілер қарудың қайдан шыққанын анықтауға кірісті. Тәртіп сақшылары жүргізген рейд барысында №2 мектептің оқушысы да қолға түсті. Ол пышақ алып, сабаққа баруды әдетке айналдырған. Бұдан былай балаларының суық қару алып жүргені үшін, ата-аналары жауапқа тартылмақ. Өйткені бұл әрекет жазасыз қалар болса, қаруға үйір жасөспірімдер қатары көбеймесе, азаймайтын сияқты. Естеріңізде болса, 2 сәуірде Шымкент қаласында «Жасөспірім» атты жедел-алдын алу іс-шарасы барысында тапанша алып жүрген екі жеткіншек ұсталған болатын. 17-дегі бозбалалардың бірінің сөмкесінен маркасы «Perestam 66» газды-травматикалық тапанша оғымен, ал екіншісінің қалтасынан «ПМ» маркалы тапанша және травматикалық қарудың оғы табылды.
Мектепке қару алып барған оқушылар ұсталды
Мектепке қару алып барған оқушылар ұсталды
