استاناداعى كونتسەرتكە اسىققان نيازىمبەتوۆ التىنعا تالاسۋ مۇمكىندىگىنەن قاعىلدى

گەرمانيادا بوكستان ءوتىپ جاتقان «Chemistry Cup» تۋرنيرىندە ادىلبەك نيازىمبەتوۆ جارتىلاي فينالعا قاتىسقان جوق. قازاق بوكسشىسىنىڭ جارىستان باس تارتۋ سەبەبىن قازاقپارات حابارلادى. 

ريو وليمپياداسىنان كەيىن العاش رەت حالىقارالىق جارىسقا قاتىسىپ جاتقان ادىلبەك كەزدەسۋلەرىن جەڭىسپەن اياقتاپ، جارتىلاي فينالعا جولداما العان بولاتىن. الايدا، بەلگىسىز سەبەپتەرمەن بوكسشىمىز شارشى الاڭعا شىقپاي قالدى.

ۇلتتىق قۇرامانىڭ باس باپكەرى مىرزاعالي ايتجانوۆتىڭ ايتۋىنشا، ادىلبەكتى قازاقستان ۇلتتىق وليمپيادا كوميتەتىنىڭ 25 جىلدىق مەرەيتويىنا وراي وتەتىن ءىس-شاراعا قاتىسۋ ءۇشىن  شۇعىل تۇردە ەلگە شاقىرتقان.

وسىلايشا، باپكەرلەر ءتۋرنيردىڭ التىنىنا ءۇمىتتى بوكسشىعا بيلەتىن الىپ بەرىپ، ەلگە قايتارۋعا ءماجبۇر بولعان.

ەسكە سالا كەتەيىك، ادىلبەك نيازىمبەتوۆ  ەكى رەت وليمپيادا فينالىنا شىعىپ، ەكەۋىندە دە كۇمىس جۇلدە يەلەندى. ءۇشىنشى وليمپياداسىنا قاتىسۋعا ءۇمىتتى بوكسشى بۇگىندە ۇلتتىق قۇرامانىڭ كاپيتانى اتانعان.

ۇقساس جاڭالىقتار

Back to top button