Қасым-Жомарт Тоқаев: Тағы бір маңызды міндет – есірткі саудасына және нашақорлыққа қарсы күрес
"Әлеуметтік кеселдің бәрімен тұтас жұрт болып жұмыла күресу қажет".
Президент 2 қыркүйектегі Жолдауында есірткі саудасына және нашақорлыққа қарсы күрестің маңызына тоқталды. Мемлекет басшысы әлеуметтік кеселдің бәрімен тұтас жұрт болып жұмыла күресу қажет екенін де айтты.
Бұл – ұлттың генетикалық қорын аман сақтап қалу мәселесі деген сөз. Біз осыған дейін қажетті заңнамалық шараларды қабылдадық. Бірақ нақты нәтижеге қол жеткіздік деуге әлі ерте. Әрбір мемлекеттік құрылым, әсіресе, құқық қорғау органдары тиімді жұмыс істеп жатыр деп айта алмаймыз. Есірткі мәселесі ушығып барады. Біз заң мен тәртіп, білім мен парасат үстемдік ететін қоғам құруымыз керек. Азаматтары, әсіресе жастары мәдениетті, жаңашыл әрі жасампаз ұлттың ұпайы түгел. Сондықтан біз өркениетті ел болуға кедергі жасайтын жағымсыз әдеттерден арылуымыз керек. Мен бұл туралы Ұлттық құрылтайдың отырысында айттым. Елдің болашағына кесірін тигізетін бес кеселге тоқталдым. Содан бері біршама жұмыс атқарылды. Вандализмге, лудоманияға тосқауыл қоятын заңдар қабылданды. Вейпке, яғни электронды темекіге тыйым салынды. Қабылданған шаралардың нәтижесі қазірдің өзінде көрініп жатыр. Әлеуметтік кеселдің бәрімен тұтас жұрт болып жұмыла күресу қажет, - деді Қасым-Жомарт Тоқаев.
