Қырғыз киносы күнінің ашылуында қырғыз режиссері Руслан Акунның «Бейиш эненин таманында» (Пейіш ананың табанында) фильмі көрсетілді, деп хабарлады turkystan.kz.
Фильм ой-өрісі сегіздегі баланың жасындай ер азаматтың қиындыққа толы өмірі және ананың балаға деген махаббаты туралы. Кинокартинаның көп бөлігі Қазақстан аумағында түсірілген.
Айта кетейік, фильмнің премьерасы Наурыз мерекесі қарсаңында Қырғызстан мен Қазақстан кинотеатрларында бірдей өтті. Басты мақсат – екі елдің мәдени байланысын нығайтып, көрші елдің кино өндіру саласына қолдау көрсету. Аталмыш фильм қырғыз киносы күндері аясында қазақстандық көрермен көретін жалғыз картина емес. 4 сәуірде «Тенирберди» (Тәңірберді) фильмі көрсетіледі. Туынды жеңіл, комедиялық жанрдағы этикалық құндылықтар тақырыбын қозғайды.
Кейінгі жылдары екі ел киноөндірушілері бірлесіп, бірнеше сәтті жобалар жасады. Атап айтсақ, қазақстандық және қырғызстандық кинематографистердің бірлескен жұмысы нәтижесінде «Үкім» фильмі түсірілді.