Президент Абай облысындағы полиция қызметкеріне алғыс білдірді
Марапатты салтанатты түрде Төтенше жағдайлар вице-министрі генерал-майор Ерлан Нұрпейісов табыс етті.
2 наурызда Қазақстан Республикасы Президенті атынан Көкпекті ауданында авариялық-құтқару жұмыстарын жүргізу кезінде қызметтік борышын орындау барысында ержүректілігі мен жанқиярлық танытқаны үшін Көкпекті АПБ әкімшілік полиция бөлімінің бастығы, полиция майоры Данияр Қайырқановқа Алғыс жарияланды.
Абай облысы ТЖД баспасөз қызметінің мәліметінше, полиция қызметкеріне марапатты салтанатты түрде Төтенше жағдайлар вице-министрі генерал-майор Ерлан Нұрпейісов табыс етті.
Естеріңізге сала кетсек, биыл 16 ақпанда ауа райының қолайсыздығына байланысты Көкпекті ауданындағы жолдарда 100-ден астам автокөлік қар тұтқынында қалған болатын.
Өміріне төнген қауіпке және күрделі метеорологиялық жағдайларға қарамастан және жолдың қарлы бұрқасын әсерінен көрінбеуін елеместен тәртіп сақшысы жолға шығып, қарда қалған автокөлік жүргізушілеріне жол көрсеткен.
Құтқару операциясын жүргізу кезінде азаматтық қорғау органдары мен ПД 381 адамды, оның ішінде 19 баланы құтқарды.
