Ақтөбе тұрғыны 2 жылдан бері тірі екенін дәлелдей алмай жүр

Ақтөбе тұрғыны екі жылдан бері өзінің тірі екенін дәлелдей алмай жүр. Бұл туралы turkystan.kz qazaqstan.tv сайтына сілтеме жасап хабарлады.

Бота Қартбаева учаскелік полицейдің қателігінен қайтыс болғандардың тізіміне еніп кеткен. Енді ол емдеу мекемелеріне қарала алмайды, соның кесірінен жұмысқа да орналаса алмаған.

38 жастағы келіншектің жеке куәлігі де, басқа құжаттары да түгел. Алайда, қазір қайтыс болған адамдардың тізімінде. Айтуынша, екі жыл бұрын Темір ауданында болған жол апаты кезінде қаза тапқан әйелдің орнына бұның жеке мәліметтері тіркеліп кеткен.

«Учаскелік полицейдің қатесі. Жеке мағлұматтарды толтырғанда, менің жеке мәліметімді толтырып жіберген. Менімен тегі бір адам қайтыс болған кезде менің жеке мәліметімді тіркеп жібереді. Жұмысқа тұра алмаймын. Емдеу мекемелеріне барып, қарала алмаймын. Ауруханаға барсам, қарамайды, өлгендердің қатарында тұрсың деп», – деді Өрлеу ауылының тұрғыны Бота Қартбаева.

Ботаның алты баласы бар. 2022 жылдың басында мемлекеттен берілетін жәрдемақы да уақытша тоқтап қалыпты. Дегенмен оны кейін қалпына келтірді. Ал медицина мекемелеріне әлі күнге дейін тіркеле алмай жүр. Қарғалы қалалық ауруханасының мамандары да оған көмек қолын созбақшы болыпты. Денсаулық сақтау басқармасына, министрлікке бірнеше мәрте хат жазған. Алайда, әзірге нәтиже жоқ.

«Электронды денсаулық сақтауды дамыту депараментінен келген жауап бойынша, Қартбаеваның туыстарына, жеке жолдасына айтқан болатын, қайтыс болғандығын алып тастау үшін әділет орындарына жүгінуі тиіс немесе мәселені сот арқылы шешуді сұрадық», – деді Қарғалы қалалық ауруханасы бас дәрігерінің орынбасары Күмісай Байболатова.

Алайда, Бота Қартбаева басқаның қателігі үшін мен неліктен қорғаушы жалдап, қаржым мен уақытымды жоғалтуым керек дейді. Облыстық полиция департаментінің өкілдері барлық инстанцияларға нақты сауалнамалық деректер жіберілгенін хабарлады. Көп балалы ананың жеке деректеріне өзгеріс енгізу үшін денсаулық сақтау министрлігіне хат жолданған.