Шетелдіктерге ЖСН берудің жаңа ережесі енгізілді
ЖСН алу үшін шетелдіктер енді Қазақстанның ішкі істер министрлігіне жеке жүгінуі қажет
Қазақстанда шетелдіктер үшін ЖСН (жеке сәйкестендіру нөмірі) берудің жаңа ережесі күшіне енді, деп хабарлады turkystan.kz Sputnik Қазақстанға сілтеме жасап.
24 ақпаннан бастап оны жеке өтінішпен ғана алуға болады.
Бұған дейін ЖСН үш тәсілмен берілген: сенім білдірілген адамдар арқылы; Қазақстан Республикасының елшілігінде; Қазақстанның тіркеуші органына өзі бару арқылы. Енді алғашқы екі элемент қолжетімді емес.
Түзетулерді Қазақстанның ішкі істер министрлігі әзірледі.
ЖСН жасау үшін шетелдік немесе азаматтығы жоқ адам мемлекеттік корпорация арқылы ІІМ-ге жүгініп, бекітілген формада өтініш беруі керек.
ЖСН барлық мемлекеттік және қаржылық операция үшін өмір бойына бір-ақ рет беріледі. Онымен қазақстандық байланыс операторынан сим-картаны ресімдеуге, банктік немесе брокерлік шот ашуға, мемлекеттік органдарға өтінішті ресімдеуге болады.
Жаңа заң 2023 жылдың 23 желтоқсанында қабылданды. Ресми жарияланғаннан кейін 60 күн өткен соң, жаңа ережелер күшіне енді.
