Тасымал табысы артпақ

Апта басында «Нұр Отан» партиясының Орталық аппаратында «Индустриялық даму» бағытында партия кураторы, ҚР Парламент Мәжілісінің депутаты Аманжан Жамаловтың төрағалық етуімен биылғы жылдың алғашқы Комиссия отырысы өтті. Отырыста Қазақстанның халық­­-аралық көлік және байланыс ағынындағы интеграциясы, жол-көлік инфрақұ­ры­лымын қамтамасыз ету мен дамыту мақсатында бірыңғай оператор орнату үшін стратегиялық инвесторларды тарту және машина жасау жағдайы, даму барысы тақырыбындағы мәселелер қаралды. Аманжан Жамалов биылғы комиссия жұмысын Елбасының «Қазақстанның үшінші жаңғыруы: Жаһандық бәсекеге қабілеттілік» Жолдауындағы ұсынылған міндеттерді ескере отырып жұмыс атқаратынын айтты. Партия хатшысы Наталья Годунова тасымалдау әлеуетін жүзеге асыру және машина жасауды дамыту мемлекеттік саясаттың стратегиялық басымдылығы екенін атап өтті. Өйткені бұл экономиканы әртараптандыруға, бәсекелестікті арт­тыруға, сайып келгенде дамыған 30 елдің қатарына енуге бағытталған. – Бұл міндеттер партияның сайлауалды бағдарламасында және Елбасының «Қазақстанның үшінші жаңғыруы: Жаһандық бәсекеге қабілеттілік» Жолдауында анық белгіленген. Бүгінде ақылды өндіріс – заман талабы. Сондықтан ақылды қалалар, зауыттар мен фабрикалар салу қажет, – деді ол. Партия хатшысы цифрлық технологияны қолданумен жүзеге асатын жаңа индустрияны тарату керектігін айтты. Жолдауда дәстүрлі базалық өндірістің дамуын күшейту, еңбек өнімділігін арттыру, автоматтандыру мен роботтандыруды енгізу сияқты міндеттер қойылғанына тоқталды. Үкіметке базалық өндірісті технологиялық қайта жарақтандыру шараларын әзірлеу тапсырылды. Экспортты дамытуға, трансұлттық компанияларды тарту, Қытаймен инвестициялық бағдарламаларды жүзеге асыру, сондай-ақ тау-кен металлургиялық және мұнай кешенінің стратегиялық маңызын сақтай отырып, жаңа нарыққа шығуға басымдық берілмек. Алдағы Конституциялық реформа туралы айта келіп, Н.Годунова Президенттің бастамасы Парламент пен Үкіметке 40 өкілеттігін беруі – өзгергіш әлемдегі жа­һандық сын-қатерлерге теңдесі жоқ жауап екенін айтты. – Реформалар, мемлекеттік басқару тиімділігін нығайту және арттыруға бағытталған. Президент стратегиялық міндеттерге, сыртқы саясат, ұлттық қауіпсіздік және елдің қорғанысына баса назар аударатын болады. Үкімет пен Парламенттің рөлі күшеймек, – деді ол. Н.Годунова өкілеттікті беру арқылы министрліктен бастап әкімшілікке дейін қабылдайтын шешімдері мен салдарына байланысты барлық орындаушы билік органдарының жауапкершілігі артатынын атап өтті. Оның айтуынша, партия Конс­титу­циялық реформаларды талқылауға белсенді кірісіп кетті. Сондай жұмыстардың нәтижесінде халықаралық сарапшылардың, елдегі жетекші заңгерлердің құптау пікір­лері алынды. Барлық ұсыныстар талданып өкілеттіктерді қайта бөлу жөніндегі жұмыс тобына жіберілмек. ҚР Инвестициялар және даму вице-министрі Роман Скляр 2017 жылы көлік жолдары жобалары үшін 286 млрд теңге қаржы бөлінгенін хабарлады. – Жалпы ұзындығы 3,2 мың болатын 12 жоба іске асырылмақшы. Тұтастай алғанда, биыл 4,4 мың шақырым болатын жер нысандар салуға және қайта құруға пайдаланылатын болмақ, – деді вице-министр. Сонымен қатар, ол халықаралық көлік және байланыс ағыны бойынша «Еуразиялық трансқұрлықтық дәліз» мультимодальды көлік дәлізін дамыту жұмыстары жүргізіліп жатқанын айтты. Бұл жүкті Азиядан Еуропаға еркін тасымалдауға мүмкіндік береді. – Көлік дәлізі екі бағыт бойынша өтеді. Бірінші бағыт – Қазақстан, Ресей және ары қарай Еуропа аумағы болса, екіншісі – Қазақстан, Әзірбайжан және Грузия арқылы Еуропаға шығу, – деді Р.Скляр. Оның айтуынша, контейнерлік тасымалдауды дамыту мақсатында аталған тасымал табиғи монополия саласынан босатылды. 2016 жылы 12 ай ішінде Қытай – ЕО – Қытай бағытында мұнай тасымалы 104,5 мың контейнерді құрады. – Инфрақұрылымды дамытудың «Нұрлы жол» мемлекеттік бағдарламасы аясында 2015-2019 жылдары 320 жобаның жүзеге асырылуы көзделген. 2016 жылы «Нұрлы жол» аясындағы көлік жолдары жолдарын жүзеге асыру үшін 324,8 млрд қаржы бөлінді, – деді ол. Инвестициялар және даму министрлігінің Индустриялық даму және өнеркәсіптік қауіпсіздік комитеті төрағасы орынбасары Тимур Нұрашев индустриялық-инновациялық дамуының алғашқы бес жылдық мемлекеттік бағдарламасында машина жасау елдегі өнеркәсіптің ішінен тез дамып келе жатқан сала екенін атап өтті. Елімізде бұрын-соңды шығарылмаған локомотив, электровоз, жолаушылар вагоны, тікұшақ, автомобиль сияқты жаңа жоғары технологиялық өнімдердің пайда болуы – соның айқын дәлелі.