Астананы дамыту барысында инфрақұрылымдық және әлеуметтік нысандардың салынуына ерекше көңіл бөлініп жатыр. Бұл туралы елорда әкімі Жеңіс Қасымбек әлеуметтік желіде жазды, деп хабарлайды turkystan.kz.
"Оларға тіршілікті қамтамасыз ету жүйелері (жылу, электр қуаты, су), мектептер, балабақшалар және оқушылар сарайлары кіреді. Біз сондай-ақ әлеуметтік нысандардың құрылысына жеке қаржыландыруды тартамыз. Қалада 4 Оқушылар сарайы жұмыс істейді (екеуі – мемлекеттік, екеуі – жекеменшік). Былтыр жалпы саны 4 мың орынға есептелген 2 жекеменшік нысан пайдалануға берілді: «Sana Bilim» – 2 мың орын (Тұран даңғылы), «Sana Sport» спорттық және шығармашылық орталық – 2 мың орын (Қажымұқан көшесі). Қазіргі уақытта біз қосымша тағы төрт білім беру нысанын (Оқушылар сарайы) салып жатырмыз. Оның үшеуі – мемлекеттік, ал біреуі жеке инвестициялардың есебінен салынып жатыр. Биыл екі нысанның құрылысын аяқтауды жоспарлап отырмыз: Мұхамедханов пен Ш.Айтматов көшелерінің қиылысында орналасқан 2000 орындық «TANYM» көпфункционалды кешені (мемлекеттік), Сығанақ көшесі, 17/41 мекенжайында орналасқан 2000 орындық «BIART» шығармашылық индустрия мектебі (жеке инвестициялар есебінен)", - деп жазды әкім.
Сондай-ақ ол 2026 жылы көпфункционалды екі кешенді пайдалануға беру жоспарланып отырғанын атап өтті.
"Келесі жылы Ақан Сері мен С189К көшелерінің қиылысында орналасқан 2000 орындық көпфункционалды кешен (мемлекеттік) және М.Төлебаев көшесіндегі 2000 орындық көпфункционалды кешен (мемлекеттік) қолданысқа беріледі. Ал 2027 жылы тағы екі нысанды пайдалануға беру жоспарланып отыр: Түркістан даңғылы мен Бұқар Жырау көшесінің қиылысындағы 2000 орындық көпфункционалды кешен (мемлекеттік) және Қарасай батыр мен Қарталы көшелерінің қиылысындағы 2000 орындық көпфункционалды кешені (мемлекеттік), - делінген Жеңіс Қасымбектің жазбасында.
