Жібек Құлымбетова ешкіммен күреспей-ақ грэпплингтен Азия чемпионы атанды
Мұндай жағдай спорттағы тәжірибесінде бірінші рет болып отыр.
Қазақстандық спортшы Жібек Құлымбетова Ташкентте ешкіммен күреспестен грэпплингтен Азия чемпионы атанды, деп хабарлады turkystan.kz.
Жарыста спортшыға ешқандай қарсылас бұйырмаған. Жібек Құлымбетова бұл туралы Instagram-дағы парақшасында жазды. Айтуынша, мұндай жағдай спорттағы тәжірибесінде бірінші рет болып отыр.
Астана қаласында джиу-джитсудан әлем чемпионатында төрт кездесу өткізіп, жеңімпаз атанған ол арада бірнеше күн өткенде Дубайдағы халықаралық жарыста үздіктер қатарынан көрінген еді.
«Соңғы уақытта, өздеріңіз көріп отырғандарыңыздай, жарыстар бірінен соң бірі өтіп жатыр. Астана қаласында Джиу-джитсудан әлем чемпионатында төрт кездесу өткізіп, чемпион атанған соң араға бірнеше күн салып Дубайға Джиу-джитсудан халықаралық жарысқа жол тарттым. Ол жерде де көк байрағымызды биікке көтеріп ел үмітін ақтап, тағы да чемпионы атандым. Дубайдағы додадан кейін елге оралып, аздаған демалыс аламын деп ойлаған едім. Алайда мені тағы бір үлкен жарыс күтіп тұр екен. Өзбекстанның астанасы Ташкентте грэпплинг AIGA күресінен Азия чемпионаты өтетінін естідім. Содан кейін демалысты екінші орынға қойып, ел намысын қорғау үшін ойланбастан «Sagadat Batyr – QTT» спорт клубының мүшелерімен бірге барып, Азия чемпионатына қатысамын деп шешім қабылдадым. Жарысқа 16-17 жас аралығындағылар арасында 48 кг салмақ дәрежесіне тіркелдім. Екі қарсыласым бар еді, неге екені белгісіз, олар аяқ асты бәсекеге қатысудан бас тартты. Бірақ алыс жерден келген соң бос кетпеу үшін ересектер арасында бақ сынап көрейін дедім. Мұнда менің 4 қарсыласым болған еді. Бірақ олар да санаулы уақыт қалғанда, басқа салмақ дәрежесіне ауысып, тағы да қарсылассыз қалдым. Сөйтіп, күреспей-ақ Ташкент қаласында өтіп жатқан грэпплинг AIGA күресінен ересектер арасында Азия чемпионы атандым. Енді керемет көңіл-күймен елге оралып, міндетті түрде кішігірім демалыс жасаймын. Себебі ағзаны демалдыруымыз керек. Содан кейін жаттығу залына оралып, келесі додаларға дайындықты бастайтын боламын» деп жазды спортшы.
