Мұқаш Ескендіров, Мәжіліс депутаты: Сөзден іске көшу керек

– Мемлекет басшысы Жолдаудағы айтылған мақсат-міндеттерді орын­дау­ға қысқа уақыт беріп отыр. Иә, бұл концепция емес, ұзақ жылдарға ар­нал­ған бағдарлама емес. Мұның барлығы бүгін-ертең жасалатын жұмыстар. Одан бөлек, Жолдаудың аяғында Мемлекет басшысы 2029 жылы біздің ЖІӨ-ді 460 миллиард АҚШ долларына жеткізуіміз керек деген үлкен мақсат қой­ды. Техника, экономикалық негіздеу деп бір жыл жүреміз. Одан кейін жо­ба жасаймыз деп екі жыл жүреміз. Оны сараптамаға, экспертизаға жі­бере­міз деп тағы бір жыл жүреміз. Сөйтіп, осы уақытқа дейін сөзбен ғана жұ­мыс істеп келдік. Сондықтан ұзаққа созбай, жұмысты бастау керек. Қазір Үкімет мүшелері, әкімдер ауысып жатыр. Барлық министрлікке міндет жүктелді. Ең алдымен, экономикамыздың локомотиві – өндіріс. Екінші – ауыл шаруашылығы. Өндіріс ком­па­ниялары, мемлекеттік, жекеменшік болсын, барлығы шындап жұмыс істейтін уақыт келген сияқты. Мы­салға, қазірдің өзінде экспорт-импорттық операцияларымыз қанша? Ендігі жылға қандай мақсат қоя­мыз? Осы салада бізге нақты, алысты көздейтін, бұлжытпай орындалуы керек жоспарлар керек. Тек пайыз­бен жоспар құрғаннан ештеңе өнбейді. Елімізде шикізат базасы бар өндіріс орындарын ашуымыз керек деп ойлаймын. Жауапты ми­нистрліктер әр кәсіпорынмен, әр үлкен компаниямен болсын, кіші компаниямен болсын, өңірлердегі әкім­діктермен бірігіп бәрі бір мақсатқа жұмылуы керек. Әр облыс өзінің өндірісті дамыту жөніндегі жос­парларын егжей-тегжейлі қарап, орындауға барын салуы қажет.