Жәндік пен тарақан қаптаған жатақханаларға студенттер наразылық танытуда

«AMANAT» партиясы жанындағы «Жастар Рухы» Жастар қанаты 14 тамыздан бастап еліміз бойынша жаппай студенттік жатақханаларға мониторинг жүргізуді бастап кетті.

Мониторинг барысында жедел желіге келіп түскен студенттердің арыз-шағымдарына сүйенсек, жағдай адам шошырлық дейді.

Бұл туралы «Жастар Рухы» ЖҚ төрағасы Нұржан Жетпісбаев әлеуметтік желідегі парақшасында жариялады.

«Студенттер үшін жатақхана мәселесі - өтініштері мен шағымдары бойынша жедел желіні іске қосқан болатынбыз. Еліміздің әр аймағынан өтініштер келіп түсуде. Желіге келіп жатқан арыз-шағымдардың ішінде, мойындау керек, адам шошырлық жағдайда тұруға мәжбүр жатақханаларды кездестірдік. Соның ішінде, «Астана Медициналық университетінің» студенттерінен жедел желіге, жеке өзіме де шағымдар көп келуде. Осыған байланысты, бүгін қайта мониторинг жүргізуді жөн көрдік.

Рейдте байқағанымыз, санитарлық-гигиеналық нормалар сақталмаған, оқу залында үстелдердің жетіспеушілігі, 2 адам тұратын бөлмеде 4 студентті қоныстандырған фактілері бар. Адам тұратын ғимаратты қаптаған тарақандар мен жәндіктер, бөлек әңгіме. Дәл осы жатақхананың тұрғындарымен тілдесіп, тіпті бір қабатта қыздар мен жігіттердің араласып тұратындығын естідік. Осы сынды өзге де жаға ұстатарлық жағдайлар кездесті. Сол себептен, дәл осы университеттің жатақханасы бойынша мәселе шешілмегенге дейін біздің қатаң бақылауымызда болады», - деп айтып өтті Нұржан Жетпісбаев.

​Қазіргі таңда «Жастар Рухы» Жастар қанаты мүшелері мониторинг бойынша жалпы - 389, оның ішінде 149 ЖОО-дағы, 240 ТжКБ-дағы студенттер үйін қамтыды.

««Ауруын жасырған өледі» деген орынды сөз бар. Кездесіп жатқан олқылықтарға көз жұмбай, бәрін қаз-қалпында, ашық айтуға студенттерді, жастарды шақырамыз. Мәселені нақтылап, көзбен көріп, тиісті орынға хаттамалар жолдап, керек болған жағдайда партия жанындағы республикалық Жастарды қолдау кеңесінде көтеруге дайынбыз», - деп Жастар қанатының төрағасы өз парақшасында атап өтті.

Серіктес жаңалықтары