Төрт күнде 66 миллион теңге жинаған кезіміз болды
Негізі, «АсарҮме» қоры 2019 жылы жалғыз менің емес, үш адамның бастамасымен құрылды. Әдепкіде үшеуіміз үш түрлі миссияны атқардық. Біреуіміз тұрмысы нашар және сырқат адамдарды дәрі-дәрмек, азық-түлікпен қамтамасыз етсек, екіншіміз мешіттерге көмектесіп, оқушыларға мектеп киімін таратуды қолға алдық. Мен болсам жұмысқа тұрғызу, білімін жалғастыру секілді келелі мәселелерді шешумен айналыстым. Осылай үш жақтап кіріссек, үйдегі баланың жағдайы түзелер деп ойладық. Сөйтсек, олай емес екен. Жиырма, отыз жыл бойы пәтерден пәтерге көшіп, сенделіп жүрген тұрғындарға баспана сыйласақ қана тұрақтылық пайда болатынын түсіндік. Сөйтіп, сонша қиындық көрген адамның басында баспанасы болса, алдына жаңа мақсат қойып, ел қатарлы тұрмыс кешеді деп қатты сендік. Сөйтіп, 2019 жылы 500, 1000 теңгеден жинауды қолға алдық. Басында «Екі-үш ай істеп көрейік, болмай жатса, таратып жібереміз» деп ойлағанбыз. Бұйырса, бір айдан соң қордың үздіксіз жұмыс істеп келе жатқанына төрт жыл болады. Сол төрт жыл ішінде 620 отбасы үйлі болды. Алғашында құрылыс жұмыстарын қолға алып, бірнеше мұқтаж жанға үй салып бердік. Бір кәсіпкер кірпіш әкеліп берсе, екіншісі үйдің төбесін жауып берді. Енді бірі пластик терезе мен есік сатып әкеп берді. Уақыт өте келе, үй салғаннан гөрі, сатып алған әлдеқайда тиімдірек екенін түсіндік. Өйткені бір үйдің құрылысы төрт-бес айға созылады, ал оның құжаттарын ресімдеуге бір жыл уақыт кетеді. Оданда үй салуға кеткен сол төрт-бес айдың ішінде кемі екі-үш баспана сыйлайтындай жүйе қалыптастыруды көздедік. Басында 500 теңгені әрең жинайтынбыз. Кейін айына 5 млн теңге жинайтын деңгейге жеттік. Қазір біздегі рекорд – халықтың арқасында осы қыста төрт күнде 66 млн теңге жинадық. Шыны керек, бұл іске кіріскенде мұндай сома жиналады деп ойламадық. Қарағанды қаласында ата-анасынан айырылған үш балаға көмектесу үшін ақша жинай бастадық. Заң бойынша ол балалардың туыстары, баспанасы болмаса, олар балалар үйіне қабылданады. «Бауырларды бір-бірінен ажыратпайық, бір шаңырақ астында, жылы жерде өсіп-өнсін. Қазір қол ұшын созбасақ, ертең олар жан-жаққа кетіп қалады» деп халыққа үндеу жолдадық. Төрт күн ішінде 66 млн жинаған халық тек оларға емес, бірнеше отбасының үйлі болуына көмектесті. Жалпы соманың 18 миллионына сол балаларға Қарағанды қаласынан жаңа пәтер алып бердік. Ал қалған сомаға басқа өңірлерде пәтерақы төлей алмай қиналып жүрген мұқтаж жандарға үй алып бердік.Айына 25 отбасына баспана сыйлаймыз
Қазір біз ай сайын жиырма беске жуық отбасына баспана сыйлаймыз. Қарап тұрсам, бәрі де ниетке байланысты екен. Бізге Нұрлан Сабуров, Jah Khalib және тағы басқа қазақстандық өнерпаздар үнемі қолдау көрсетеді. Олар мұндай іске кіріспес бұрын алдымен «Қор халыққа есеп бере ме? Жоқ әлде өз бетінше ақшаны жұмсай ма?» деп қордың есебін тексереді екен. Қор жетекшілеріне сенім артып, ертесі опық жеп қалмас үшін бәрін жіті тексеріп, мұқият қадағалайды. Біз апта сайын есеп жариялап отырамыз. Есепті құр чек көрсетумен ғана емес, видео түрінде әзірлейміз. «Міне, бәленбай миллионға Қызылорда облысынан, ал мына сомаға Маңғыстау облысындағы тұрғындарға үй сыйладық» деп әр өңірде видео түсіріп жария етеміз. Мұны көрген көпшіліктің бізге деген сенімі арта түсетіні айтпаса да түсінікті. Көмек қолын созғандардың арасында біз кезінде көмектескен отбасы мүшелері де бар. Екі-үш жыл бұрын біз арқылы баспаналы болғандар екі-үш миллион теңге жинауға тырысып жатыр. Кейбірі 20 мың, енді бірі 5 мың аударып, шамасы жеткенше көмектесіп жүр. Жүректі қозғаған мына бір оқиға есімнен кетер емес. Бір жыл бұрын бес баласы бар жалғызбасты анаға баспана сыйлаған едік. Анасы тігіншілікпен айналысады. Ал он жеті жастағы қызы торт пісіріп сатады. Екі күн біздің кеңсеге анасымен бірге келген сол қыз қолымызға алпыс мың теңге ұстатып: «Халық маған баспана сыйлап жатқанда біз де қосылайық, шет қалмайық деп шештік. Халықтың бізге жасаған жақсылығын еш ұмытпаймыз» деді. Ал біздің көздеген мақсатымыз да осы еді. Кезінде қиын жағдайда өмір сүрген, мұқтаж деген сөздің мағынасын жете түсінетін олар өзгелерге көмектессе екен, біз бастаған игі істі жалғастырып әкетсе екен деп ойлайтын едік. Ойлағанымыз іске асты. Біз жасаған тізімде еліміздің 17 өңірінде тұратын төрт жүз отбасы кезекте тұр. «Оларды қалай үйлі қыламыз?» деп бас қатырдық. Ойлана келе, ұлық мереке – Наурыз мейрамымен қатар келген қасиетті Рамазан айында «Наурыз Асар» акциясын бастайық деп шештік. Ондағы мақсат – Рамазан айында 100 отбасына 100 үй сыйлау. Адамдар Рамазан секілді мейірімділік айында пітір садақа таратып, жақсылық жасағысы келіп тұрады. Осыны пайдаланып, жеті жүз адам құр тізімде тұра бермесін, кемі жүзіне үй алып берейік деп осындай акция бастадық. Кәсіпкерлерге, ірі компанияларға «Бұл игі іске сіздер де атсалысыңыздар» деп үндеу тастадық. Salam Bro компаниясының басшылығы «Бізден бір баспана болсын» деп бір баспана сыйлады. Бүгін екі құрылыс компаниясы үш баспана берді. Алматыдағы бір ірі компания бес баспана алып берді. Тағы бір компания екі пәтер алып беретінін айтты. Баспанаға қаражатты түрлі тәсілдермен жинап жатырмыз. Акциямыз туралы бейнероликті тоғыз миллион екі жүз мыңға жуық адам қарады. Бұл дегеніміз – Қазақстан халқының тең жартысы. Көп адам «Жинаған-тергенімізді жібердік. Тағы қалай көмектессек болады?» деп хабарласып жатыр. Жап-жас блоргерлер байланысқа шығып «Біз өз парақшамызда онлайн аукцион жасайық», «Менде құнды заттар бар. Соны аудиторияма сатып көрейін. Түскен ақшаны сіздерге аударамын» деп өздері бастама көтеріп жатыр. Оларға ТМД елдері арасында әйгілі «Грэмми» сыйлығын алған Иманбек қосылып жатыр. Бұл акцияны бастағанымызға бір апта болды. Бір аптаның ішінде жүз үйдің жиырма шақтысын сатып алуға жететін қаражат жинадық.Қайырымдылық жасау – қанымызда бар қасиет
Мамандығым бойынша мен – тарихшымын. Қайырымдылық жасау қанымызда бар қасиет екенін тарихты зерттеп оқып жүргенде білгенмін. Аталарымыз кезінде Наурыз айын қалай өткізген? Наурыздың мағынасы жаңа өмір бастау дегенге сайып келеді ғой. Бай-қуатты болған аталарымыз қаһарлы қыстан әупірімдеп шығып, қыстақтан жайлауға бара жатқан көшті тоқтатып, «Осы қыста қайсысыңның малың қырылып қалды? Мен орнын толтырып берейін» деп алдынан шығып, өз қорасына ертіп барып, бірнеше малды қосып жіберген ғой. Сосын ХХ ғасырда Еуразия құрлығында болмаған феномен Қазақстанда болған. 1944 жылы қазақтың саны төрт миллионнан ары аспаған. Ашаршылықты көргені аздай, сұрапыл соғыс салдарынан кеудесін көтере алмай жүрген олар өз жерлеріне табан тіреген бір миллионға жуық өзге ұлтты құшақ жая қарсы алып, үйлеріне кіргізіп, нан беріп, жатар жер ұсынған. Ойлаңызшы, төрт миллион аш халық сырттан келген бір миллион аш халыққа қамқор болуға тырысқан. Сондықтан қайырымдылық жасау, мұқтаж жанға көмектесу қанымызда бар қасиет деп бекерге айтпаймын. Аталарымыздың сол жасаған игі істерінің жақсылығын қазір біз көріп отырмыз. Үлкендеріміз «Таза ниетпен жасаған игі іс, ізгі амалдар жетінші ұрпаққа дейін тиеді» деп айтады. Ата-бабаларымыз бастарынан өткен түрлі қиындықты тек ақ білектің күшімен, ақ найзаның ұшымен емес, жанашыр болу, мейірім төгу, көмек қолын созудың арқасында да еңсеріп шыққан. Бір-біріне қамқор болу – біздің бойымыздағы алапат күш. Бауырының, көршісінің басына қиын күн түсіп тұрғанын естісе, орнынан атып тұрып, қорасындағы жалғыз жылқысын сатып, көмектескен халықтың ұрпағы емеспіз бе? Танысы, туысы болмаса да, кезінде аталарымыз көкпарға, құрылтайға, жиындарға, тіпті құда түсуге барғанда танысқан адамдарға көмектесуге асығып, алып-ұшып тұрған ғой. Біз де оларға лайық ізбасар болуға тырысып жүрміз. Негізі, мен он екі жыл саудамен айналысқанмын. Кішігірім кәсібім болған. Уақыт өте келе, елдің алғысына бөленгеннен артық ештеңе жоқ екенін түсініп, айналама көмектесе бастадым. Кейін төрт жыл бойы қиналып жүрдім, себебі бастаған бизнесім «күйіп» кетіп, қарызға батып кеттім. Пәтерге төлейтін ақы былай тұрсын, түскі асқа ақша таба алмай қиналған кездерім болды. Кеңсе жоқ, көшедегі орындықтың үстінде құжаттарымды реттеп, жұмыс істеген кезім көп. Мұны мені аясын деп емес, жастарға сабақ болсын деп айтып отырмын. Шырғалаңнан шығудың жолын іздеп жүрсем де, әлеуметтік жобаларды жүргізуді, тұрмысы нашар отбасыларға көмектесуді тоқтатпадым. Қарызын сұрап келген адамдарға «Қарыздарымды төлеймін. Қашып кетпеймін. Жұмыс істеп жүрмін. Маған уақыт беріңдер. Бірақ алдымен мұқтаж жандарға көмектесуімді тоқтатпаймын. Мен оларға көмектессем, Алла Тағала менің жағдайымды түзейді» деп айтатынмын. Айтқанымдай-ақ, жағдайым түзелді. Расында, садақа жолыңды ашады, бәледен сақтайды, берекеңді арттырады. Соны дер кезінде түсініп, мұқтаж жандарға көмектесуді ерте қолға алып, айналамды да соған жұмылдыра алғаныма қуаныштымын.Жазып алған Әлия ТІЛЕУЖАНҚЫЗЫ