50307
Қазақстан жаңа эпидемияға дайын ба?
Қазақстан жаңа эпидемияға дайын ба?
![Қазақстан жаңа эпидемияға дайын ба?](https://turkystan.kz/cache/imagine/1200/uploads/resized-images/2023/02/thumbs_b_c_c9ab67ed5edc8a7b1fde98e3782fbe77.jpg)
Жаһандағы тырысқақ ауруының өршу қаупі және еліміздің жаңа эпидемияға дайындығы туралы ҚР ДСМ Санитарлық-эпидемиологиялық бақылау комитеті жұқпалы ауруларды қадағалау басқармасының басшысы Роза Қожапова Орталық коммуникациялар қызметінде өткен баспасөз мәслихатында айтты деп хабарлады turkystan.kz.
Баспасөз жиында «Дүниежүзілік денсаулық сақтау ұйымы тырысқақтың әлемде таралу қаупін өте жоғары деп атады. Біздің елімізде барлық ауылдардың орталық сумен қамтамасыз етілмейтінін ескерсек, осындай қауіп бар ма?» - деп сұрады тілші.
Оның айтуынша, ведомство ауыз судың да, ашық су қоймаларындағы судың да сапасын тұрақты негізде тексереді.
Жұқпалы ауруларды қадағалау басқармасының басшысы биыл әлемнің бірқатар елдерінде, негізінен Африка елдері мен Сирияда тырысқақпен сырқаттанудың асқынуы байқалғанын растады.
«Бірақ, Қазақстан аумағында соңғы 10 жыл ішінде тырысқақ ауруы тіркелген жоқ. Тырысқақ – адамнан адамға су арқылы тікелей жұғатын ауру. Тұрақты негізде ауыз судың да, ашық су қоймаларындағы судың да сапасына бақылау жүргізіледі. Ашық су айдындарында қоздырғыштардың, оның ішінде тырысқақтың болу-болмауы үнемі зерттеледі. Бүгінгі таңда осы зерттеулердің нәтижелері бойынша біздің елде тырысқақ ауруы тарауы мүмкін деген қауіп жоқ», - деп түсіндірді Роза Қожапова.
Соған қарамастан, бірқатар елдерде тырысқақ ауруы тіркелгенін ескере отырып, мемлекеттік шекарада елге келген азаматтарды бақылау, тексеру жүргізіледі.
«Ол адамдардан ауру табылса, бірден оқшауланады. Медициналық көмекке жүгінген адамдардың ауру тарихы нақтыланады. Егер адамдар шетелден келсе және оларда ұқсас ауру байқалса, эпидемияға қарсы шаралар жүргізіліп, оқшауланады. Алайда, бүгінгі таңда ашық су қоймаларын зерттеу нәтижелері бойынша жағдай тыныш», - деп толықтырды дәрігер.