مەدۆەدەۆتىڭ قازاقستان جايلى شۋلى جازباسىنا قاتىستى تىڭ دەرەك ايتىلدى

2 تامىزعا قاراعان ءتۇنى رەسەي فەدەراتسياسى قاۋىپسىزدىك كەڭەسى توراعاسىنىڭ ورىنباسارى، رەسەيدىڭ بۇرىنعى پرەزيدەنتى دميتري مەدۆەدەۆتىڭ ۆكونتاكتە جەلىسىندە قازاقستانعا قاتىستى جازبا جاريالاندى. بىراق ءماتىن بىرنەشە مينۋتتان كەيىن وشىرىلگەن دەپ حابارلادى turkystan.kz.

سوعان قاراماستان الەۋمەتتىك جەلى قولدانۋشىلارى جازبانىڭ سكرينشوتتارىن ساقتاپ ۇلگەرگەن.

جازبادا «ءبىز ءوز وتانىمىزدىڭ شەكاراسىن قالپىنا كەلتىرۋ بويىنشا جۇمىستاردى قولعا الامىز. وزدەرىڭىز بىلەتىندەي، رەسەي شەكاراسى ەش جەردەن اياقتالمايدى» دەگەن سويلەمدەر بار.

سونداي-اق، 1801 جىلعا دەيىن گرۋزيا سياقتى ەل بولماعانىن، ونىڭ تەك رەسەي يمپەرياسىنىڭ شەكاراسىندا عانا پايدا بولعانى جازىلعان.

«سولتۇستىك جانە وڭتۇستىك وسەتيا، ابحازيا جانە گرۋزيانىڭ قالعان اۋماقتارى تەك رەسەي قۇرامىندا عانا بىرىكتىرىلۋى مۇمكىن»، – دەلىنگەن جازبادا.

ماتىندە قازاقستاندى «جاساندى مەملەكەت» جانە «بۇرىنعى رەسەيلىك تەرريتوريادا ورنالاسقان» دەپ اتاعان.

سونداي-اق، «قازاقستانعا ورىستار بارمايىنشا، ءتارتىپ ورنامايدى» دەگەن سويلەم بار.

جازبادان «كەزىندە ۇلى جانە قۇدىرەتتى كەڭەس وداعىن مەكەندەگەن بارلىق حالىقتار قايتادان دوستىق پەن ءوزارا تۇسىنىستىكتە بىرگە ءومىر سۇرەتىن بولادى» دەگەن سويلەمدى دە كەزىكتىرۋگە بولادى.

كەيىن دميتري مەدۆەدەۆتىڭ كومەكشىسى ريا نوۆوستيگە رف قاۋىپسىزدىك كەڭەسى باسشىسىنىڭ ورىنباسارىنىڭ ۆكونتاكتە جەلىسىندەگى پاراقشاسى بۇزىلعانىن ايتتى.

ونىڭ ايتۋىنشا، پاراقشانى بۇزعانداردى الەۋمەتتىك جەلىنىڭ اكىمشىلىگى انىقتاپ جاتىر. ال ۆكونتاكتەنىڭ ءباسپاسوز قىزمەتى ربك-عا دميتري مەدۆەدەۆتىڭ پاراقشاسىنداعى جازبانى وزگە بىرەۋ جاريالاعانىن مالىمدەدى.

ۇقساس جاڭالىقتار

Back to top button