اقتوبەدە جەرگىلىكتى بيۋدجەت ەسەبىنەن 87 ءبىلىم گرانتى بولىنەدى

اقتوبەدە بيىل 87 ءبىلىم گرانتى بولىنەدى. كادر تاپشىلىعى سەزىلەتىن سالالارعا باسىمدىق بەرىلمەك دەپ حابارلادى turkystan.kz  

ءبىلىم گرانتتارىن ءبولۋ جونىندەگى كوميسسيا وتىرىسىنا وبلىس اكىمى وڭداسىن ورازالين، مەملەكەتتىك ورگانداردىڭ باسشىلارى قاتىستى. بيىل جەرگىلىكتى بيۋدجەت ەسەبىنەن بارلىعى 87 ءبىلىم گرانتى بولىنەدى.

«وبلىستا 210 مۇعالىم جەتىسپەيدى. وسىعان وراي، ماتەماتيكا، فيزيكا، حيميا، اعىلشىن جانە ورىس ءتىلى ءپانى مۇعالىمدەرىن دايارلاۋعا 35 گرانت ءبولۋ تۋرالى شەشىم قابىلداندى. تاعى 20 گرانت دارىگەرلەردى وقىتۋعا بولىنەدى. سونداي-اق وبلىستىق بيۋدجەت ەسەبىنەن قۇرىلىس، ەنەرگەتيكا، اۋىل شارۋاشىلىعى جانە ت.ب سالا ماماندارى وقىتىلادى. ماماندىقتار ءتىزىمى وبلىستىق ءبىلىم باسقارماسىنىڭ الەۋمەتتىك جەلىلەردەگى رەسمي پاراقشالارىندا جاريالانادى. بايقاۋعا قاتىسۋ ءۇشىن قۇجاتتاردى قابىلداۋ 15 تامىزعا دەيىن جالعاسادى»، – دەدى وبلىستىق ءبىلىم باسقارماسىنىڭ باسشىسى جولداس باتىرحان.

وبلىس اكىمى قولعا ديپلوم العان كەزدە قويىلاتىن تالاپتى جان-جاقتى تۇسىندىرۋگە تاپسىرما بەردى.

 «جوعارى وقۋ ورنىن بىتىرگەن ءاربىر مامان وبلىستاعى كادر تاپشىلىعى بار كەز كەلگەن ەلدى مەكەنگە بارىپ، كەمىندە 5 جىل كەلىسىمشارتپەن جۇمىس ىستەۋگە مىندەتتى. سول سەبەپتى اقشا ءبولىپ، سۇرانىسقا يە ماماندىقتارعا وقىتىپ جاتىرمىز»، – دەدى وبلىس اكىمى وڭداسىن ورازالين.

اقتوبەدە وبلىستىق بيۋدجەت ەسەبىنەن ءبىلىم گرانتتارىن تاعايىنداۋ بايقاۋى العاش رەت 2018 جىلى ءوتتى. قازىر 15 جوعارى وقۋ ورنىندا 251 ستۋدەنت ءبىلىم الىپ ءجۇر. 2021 جىلى 17 اقتوبەلىك رەزيدەنتۋرانى اياقتاسا، بيىل 25 باكالاۆر جانە 21 رەزيدەنت بىتىرەدى. وبلىستىق ءبىلىم باسقارماسىنىڭ حابارلاۋىنشا، بيىل دوپلوم العان 46 جاس ماماننىڭ جۇمىس ورنى انىقتالدى.

قۇرالاي باباجانوۆا

اقتوبە قالاسىنداعى 78 جالپى ورتا ءبىلىم بەرەتىن گيمنازيانىڭ 11 «ا» سىنىپ وقۋشىسى

ۇقساس جاڭالىقتار

Back to top button