«وكم وپەراتورىنىڭ» قۇرىلتايشىسىنا ىزدەۋ جاريالاندى

«وكم وپەراتورى» جشس قۇرىلتايشىسى شنار مۋكتاروۆاعا ىزدەۋ جاريالاندى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى مالىمدەدى دەپ حابارلادى turkystan.kz.

اگەنتتىكتىڭ مالىمەتىنشە، «وكم وپەراتورى» جشس باسشىلىعىنا جانە باسقا دا تۇلعالارعا قاتىستى اسا ءىرى مولشەردە اقشا جىمقىرۋ بەلگىلەرى بويىنشا تەرگەۋ جالعاسىپ جاتىر.

«قىلمىستىق ءىس اياسىندا 2017-2018 جىلدار ارالىعىندا ەكولوگيالىق كودەكس تالاپتارىن بۇزا وتىرىپ، وعان 920 ميلليون تەڭگە مولشەرىندە ديۆيدەند تۇرىندە زاڭسىز تولەنگەن ۋتيلالىم قاراجاتىن يەلەنگەن «وكم وپەراتورى» جشس بۇرىنعى قۇرىلتايشىسى شنار مۋكتاروۆا كۇدىككە ءىلىندى»، – دەلىنگەن حابارلامادا.

شنار مۋكتاروۆاعا قاتىستى سوت قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى. سونداي-اق، ىزدەستىرىلىپ جاتقان ادامنىڭ ورنالاسقان جەرى تۋرالى اقپارات بەرگەنى ءۇشىن 4 000 ايلىق ەسەپتىك كورسەتكىشكە (اەك) دەيىن سىياقى كوزدەلگەن.

call-تسەنتر 1424

+7 (7172) 909 260

شنار مۋكتاروۆا

Back to top button