اقتاۋدا قوعامدىق كولىكتەر 100 پايىزعا جاڭاردى

بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ماڭعىستاۋ وبلىسىنىڭ اكىمى نۇرلان نوعاەۆ مالىمدەدى دەپ حابارلادى turkystan.kz.

وبلىس ورتالىعىنداعى اۆتوبۋستاردىڭ ءبىر بولىگى سوڭعى رەت 2011 جىلى جاڭارتىلعان. 2020 جىلعا دەيىن قالاداعى اۆتوبۋس مارشرۋتتارىنىڭ ورنىنا ەسكى ۇلگىدەگى كولىكتەر بولدى.

2020 جىلى ماڭعىستاۋ وبلىسى جانە اقتاۋ قالاسى اكىمدىكتەرىنىڭ قولداۋىمەن «كاسپي» اكك اق-نا «قازاقستان دامۋ بانكى» اق-نىڭ ليزينگتىك باعدارلاماسى ارقىلى 18 دانا جاڭا اۆتوبۋس ساتىپ الىنىپ، №3، №7 مارشرۋتتارىنا قىزمەت كورسەتۋگە بەرىلدى.

سونداي-اق 2021 جىلدىڭ اقپان ايىندا قالانىڭ №5، №4 مارشرۋتتارىن جاڭارتۋ ماقساتىندا، تاسىمالداۋشى مەكەمە ءوز تاراپىنان 20 اۆتوبۋس اكەلىپ، قولدانىسقا بەردى. وسىلايشا قالاداعى قوعامدىق كولىكتەردىڭ 70%-ى جاڭارعان.

جوسپار بويىنشا، قالعان №2، №4 مارشرۋتتاردىڭ اۆتوبۋستارىن جاڭارتۋ ماسەلەسى كۇن تارتىبىندە تۇر. اتالعان ماسەلەنى شەشۋ بويىنشا ماڭعىستاۋ وبلىسى جانە اقتاۋ قالاسى اكىمدىكتەرىنىڭ قولداۋىمەن «كاسپي» اكك اق-ى ارقىلى 16 دانا جاڭا اۆتوبۋس ساتىپ الۋ ءۇشىن ەكونوميكالىق نەگىزدەمە دايىندالدى.

ونىڭ العاشقى 20% جارناسى مەملەكەت بيۋدجەتىنىڭ ەسەبىنەن تولەنىپ، اۆتوبۋستاردىڭ 12 داناسى ماۋسىم ايىندا قالاعا جەتتى.

بۇل قوعامدىق كولىكتەر تابيعاتى كونتينەنتالدى ماڭعىستاۋ جەرىنە بەيىمدەلگەن. كولىكتەردىڭ ەرەكشەلىگى – جازدى كۇندەرى مۇزداتقىشتارىن پايدالانۋعا بولادى، سونداي-اق جەلىسىز ۆاي-فاي، ونلاين تولەم جاساۋعا ۆاليداتورلار ورناتىلعان، مۇگەدەكتەرگە ارنالعان پاندۋستارىمەن، ەڭ باستىسى، جولاۋشىلار قاۋىپسىزدىگى ءۇشىن 4 بەينەكامەرامەن جابدىقتالعان. 3 بەينەكامەرا اۆتوبۋستىڭ ىشىندە، 1-ەۋى سىرتىندا ورنالاسقان. اۆتوبۋستارداعى بەينەكامەرالار وبلىستىق پوليتسيا دەپارتامەنتىنىڭ جەدەل باسقارۋ ورتالىعىنا تىكەلەي قوسىلادى.  بۇل قوعامدىق كولىكتەر 56 جولاۋشىعا ارنالعان.

ۇقساس جاڭالىقتار

Back to top button