حالىق ءسوزىن ايتاتىن بيىك مىنبەر: «Miras» وتىرىسى ءوتتى

 «AMANAT» پارتياسىنىڭ «Miras» كەڭەسىندە ۇلتتىق قۇرىلتايدىڭ ماقساتى مەن مىندەتى تالقىلاندى دەپ حابارلادى turkystan.kz.   

16 ماۋسىم كۇنى ەل تاريحىندا تۇڭعىش رەت ۇلت ورداسى ۇلىتاۋدا ەلدىڭ ەلەۋلى ازاماتتارىنىڭ باسىن قوسقان ۇلتتىق قۇرىلتاي وتكەنى بەلگىلى. وسى ورايدا كەڭەس توراعاسى، ءماجىلىس دەپۋتاتى امانجول ءالتاي قۇرىلتايدىڭ ماقساتى مەن مىندەتىنە توقتالدى.

«قۇرىلتاي – اتا-بابامىزدان كەلە جاتقان اسا ماڭىزدى شەشىم قابىلدايتىن ۇلىق جيىن. ول – دالا دەموكراتياسىنىڭ جارقىن كورىنىسى. ءبىز اتا-بابا اماناتىن ارقالاپ، جولىن جالعاپ، كونە ءداستۇردى جاڭعىرتتىق. ارادا عاسىرلار وتسە دە، ماقساتىمىز ورتاق – بىرلىكتى بەكەم ەتىپ، القالى جيىندا ۇلتىمىزدىڭ بولاشاعىن ايقىندايتىن شەشىمدەر قابىلداۋ»، –  دەدى ول.

ءوز كەزەگىندە «ەگەمەن قازاقستان» اق باسقارماسىنىڭ توراعاسى، «AMANAT» پارتياسى ساياسي بيۋروسىنىڭ مۇشەسى دارحان قىدىرالى قۇرىلتايدى اشىق قوعامنىڭ تاعى ءبىر كورىنىسى دەپ باعالاپ، ونىڭ وزگە كەڭەسۋ الاڭدارىنان ايىرماشىلىعىن كەڭىنەن تارقاتىپ ايتتى.

حالىق ءسوزىن ايتاتىن بيىك مىنبەر: «Miras» وتىرىسى ءوتتى

«جاڭا قازاقستاننىڭ مىندەتى – اشىق ازاماتتىق قوعام قۇرۋ، ادىلەتتى مەملەكەت ورناتۋ، دەموكراتيالىق ۇدەرىستەردى جۇرگىزۋ. ال قۇرىلتاي اشىق ازاماتتىق قوعامدى دامىتۋعا ۇلكەن ۇلەس قوسادى. مۇنداعى ايتىلعان پىكىرلەردىڭ بارلىعى ەلدىڭ مۇڭ-مۇقتاجىن، حالىقتىڭ تىلەگىن جەتكىزۋى ءتيىس. قۇرىلتاي – بۇل حالىقتىق قۇرىلىم. سوندىقتان ونى اشىق قوعامنىڭ تاعى ءبىر كورىنىسى دەپ ايتۋعا بولادى. بىزدە پارلامەنت، ءماجىلىس، سەنات، اسسامبلەيا جانە باسقا دا مىنبەرلەر بار. بىراق قۇرىلتاي حالىق وكىلدەرىنىڭ اراسىنان جينالعاندىقتان، حالىقتىڭ ءسوزىن ايتاتىن بيىك مىنبەر بولادى دەپ سەنەمىز»، – دەدى دارحان قىدىرالى.

ۇلتتىق قۇرىلتايدىڭ قۇرامىندا ەتنولوگ، گەوگراف، فيلوسوف، جاراتىلىستانۋشىلار بولۋى كەرەك دەپ ەسەپتەيدى فيلولوگيا عىلىمدارىنىڭ دوكتورى، پروفەسسور سەرىك نەگيموۆ.

« ۇلىتاۋدا وتكەن قۇرىلتايعا حالىقتىڭ ءسوزىن سويلەيتىن مەملەكەت جانە ۇلت قايراتكەرلەرى وتە جاقسى ىرىكتەلىپ الىنعان. بولاشاقتا ورىن الادى دەپ بولجانىپ وتىرعان سۋ، ازىق-ت ۇلىك تاپشىلىعى، جەر ماسەلەلەرىن ەسكەرە وتىرىپ، ەندىگى قۇرىلتايدىڭ قۇرامىنا مامانداردى ەنگىزۋ كەرەك. ەل تىنىشتىعى، تەرريتوريامىزدىڭ تۇتاستىعى، حالقىمىزدىڭ ءال-اۋقاتى سىندى وتە وزەكتى ماسەلەلەردىڭ شەشىلۋىنە قۇرىلتاي سەبەپكەر بولۋى ءتيىس»، – دەدى عالىم.

العاشقى قۇرىلتايعا 117 ادام ىرىكتەلىپ الىنعانى بەلگىلى. دەگەنمەن بۇل ءتىزىم اۋىسىپ تۇرادى. بەلسەندى، حالىق ءۇشىن، ەلدەگى ورتاق ماسەلەلەردى شەشۋ ءۇشىن ۇلەس قوسامىن دەگەن كەز كەلگەن قازاقستاندىق ازاماتتىڭ بولاشاقتا وسى كەڭەسكە قاتىسۋعا مۇمكىندىگى بار. بۇل تۋرالى «باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ پرەزيدەنتى، ۇلتتىق قۇرىلتاي توراعاسىنىڭ ورىنباسارى بيبىگۇل جەكسەنباي ايتتى.

حالىق ءسوزىن ايتاتىن بيىك مىنبەر: «Miras» وتىرىسى ءوتتى

ونىڭ ايتۋىنشا، قازىر «قۇرىلتاي» دەپ اتالاتىن ارنايى ءموبيلدى قوسىمشا جاسالىپ جاتىر. ول كۇزدە ىسكە قوسىلادى. ءموبيلدى قوسىمشا ارقىلى كەز كەلگەن ازامات ءوز ۇسىنىسىن قۇرىلتايعا جولداي الادى.

«قۇرىلتايدىڭ ۇلتتىق كەڭەستەن ارتىقشىلىعى مۇندا ايماقتارداعى كەڭەستەردىڭ وكىلدەرى قاتىسادى. جەرگىلىكتى جەرلەردەگى ماسەلەلەر دە تىس قالماۋى ءۇشىن ارنايى تەلەۆيزيالىق جوبا قولعا الىنادى. ول – «حابار» جانە «Qazaqstan» تەلەارنالارىنىڭ ۇيىمداستىرۋىمەن وتەتىن ۇلكەن باعدارلاما. ياعني، ۇلتتىق قۇرىلتاي ماسەلەلەردى جىلىنا ءبىر رەت بولاتىن جيىندا تالقىلاپ قويماي، ۇزدىكسىز جۇمىس ىستەيتىن ۇلكەن الاڭ بولادى»، – دەدى ب.جەكسەنباي.

ءوز كەزەگىندە «حابار» اگەنتتىگى» اق باسقارما توراعاسى  بەرىك ءۋالي تەلەارنادا «ۇلتتىق قۇرىلتاي» دەپ اتالاتىن ارنايى تەلەمارافون جانە مەملەكەت باسشىسى ايتقان ەڭبەك ادامىنا قۇرمەتتى ناسيحاتتاۋ ءۇشىن ارنايى جوبالار دايىندالىپ جاتقانىن جەتكىزدى.

ۇقساس جاڭالىقتار

Back to top button