قىرعىزستان مەن تاجىكستان شەكاراسىندا اتىس بولدى

14 ماۋسىمدا مەملەكەتتىك شەكارانىڭ قىرعىز-تاجىك ۋچاسكەسىندە قىرعىزستان مەن تاجىكستان شەكاراشىلارى اراسىندا اتىس بولدى دەپ حابارلادى turkystan.kz Azattyq Ruhy-نا سىلتەمە جاساپ.

قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى شەكارا قىزمەتىنىڭ اقپارات باسقارماسىنىڭ مالىمەتىنشە، ساعات 6.50-7.00 شاماسىندا باتكەن وبلىسى باتكەن اۋدانىنا قاراستى بۇلاق-باشى اۋدانىندا «كەح» شەكارا بەكەتىنەن (تاجىكستان) بۇلاق-باشى شەكارا بەكەتىنە (قىرعىزستان) قاراي وق اتىلعان. بۇعان جاۋاپ رەتىندە قىرعىز تاراپى تاجىك بەكەتىنە قاراي وق اتقان.

«ەكى تاراپتىڭ شەكاراشىلارى دەرەۋ سوعىس قيمىلىنا دايىندالدى. قىرعىز رەسپۋبليكاسىنىڭ باتكەن وبلىسى بويىنشا شەكارا وكىلى مەن تاجىكستان رەسپۋبليكاسىنىڭ سوعدى وبلىسى بويىنشا شەكارا وكىلى تەلەفون ارقىلى سويلەستى. شەكارا وتريادتارىنىڭ باسشىلارى وقيعا ورنىنا اتتاندى»، – دەلىنگەن حابارلامادا.

قىرعىزستان ۇقمك شق مالىمەتىنشە، ساعات 7.50-دە تاجىك تاراپى گراناتومەت پەن مينومەتتەردەن تاعى دا وق اتا باستاعان. ساعات 8:10-دا اتىس توقتاتىلدى. اتىس سەبەبىن انىقتاۋ جانە جاعدايدىڭ ۋشىعۋىنا جول بەرمەۋ ءۇشىن تاراپتاردىڭ شەكارا وكىلدەرىنىڭ كەزدەسۋى ءوتىپ جاتىر.

08:40-تاعى جاعداي بويىنشا شەكارانىڭ قىرعىز-تاجىك ۋچاسكەسىندە جاعداي شيەلەنىسىپ تۇر.

ۇقساس جاڭالىقتار

Back to top button