ەۇۋ العاش رەت الەمنىڭ ۇزدىك 300 ۋنيۆەرسيتەتىنىڭ قاتارىنا كىردى

ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى QS World University Rankings 2023 الەمدىك رەيتينگتە ءبىر جىلدا 51 ساتىعا كوتەرىلىپ، 277-ورىندى يەلەندى. ۇلىبريتانيالىق Quacquarelli Symonds حالىقارالىق اگەنتتىگى ۇزدىك جوعارى وقۋ ورىندارىنىڭ جىل سايىنعى حالىقارالىق رەيتينگىسىنىڭ ناتيجەلەرىن جاريالادى.

ل.ن. گۋميلەۆ اتىنداعى ەۇۋ QS جوعارى وقۋ ورىندارىنىڭ الەمدىك رەيتينگىسىندە كەزەكتى رەت قارقىندى ىلگەرىلەۋدى كورسەتتى. ۋنيۆەرسيتەت ءبىر جىلدا 328-ورىننان 277-ورىنعا كوتەرىلىپ، العاش رەت الەمنىڭ ۇزدىك 300 جوعارى وقۋ ورنىنىڭ قاتارىنا ەندى.

سوڭعى 4 جىلدا ەۇۋ حالىقارالىق رەيتينگىدە 141 ساتىعا كوتەرىلدى. ۇلتتىق ۋنيۆەرسيتەت 2025 جىلعا قاراي دامۋ ستراتەگياسىنا سايكەس QS رەيتينگىنىڭ توپ-200 قاتارىنا كىرۋگە نيەتتى.

ۋنيۆەرسيتەت «شەتەلدىك پروفەسسورلىق-وقىتۋشىلىق قۇرام»، «جۇمىس بەرۋشىلەر اراسىنداعى بەدەل» جانە «اكادەميالىق ساراپشىلار اراسىنداعى بەدەل» كريتەريلەرى بويىنشا پوزيتسياسىن نىعايتتى. بۇل رەتتە ۋنيۆەرسيتەتتىڭ «ءبىلىم الۋشىلار مەن پروفەسسورلىق-وقىتۋشىلىق قۇرامنىڭ ارا قاتىناسى» جانە «شەتەلدىك پروفەسسورلىق-وقىتۋشىلىق قۇرام» ينديكاتورلارى بويىنشا كورسەتكىشتەرى الەم بويىنشا جوعارى وقۋ ورىندارىنىڭ ورتاشا ناتيجەسىنەن ايتارلىقتاي اسىپ ءتۇستى.

بيىل حالىقارالىق رەيتينگىگە قاتىسقان جوعارى وقۋ ورىندارىنىڭ قاتارى 47 پايىزعا ارتتى. الەمنىڭ 100 مەملەكەتىنەن 2 462 ۋنيۆەرسيتەت قاراستىرىلىپ، ونىڭ 1 422-ءسى قورىتىندى رەيتينگىگە كىردى. الەمنىڭ ۇزدىك جوو اراسىندا قازاقستاننىڭ 16 ۋنيۆەرسيتەتى بار، ولاردىڭ ەكەۋى تىزىمگە العاش رەت ەندى.

ەۇۋ العاش رەت الەمنىڭ ۇزدىك 300 ۋنيۆەرسيتەتىنىڭ قاتارىنا كىردى

QS رەيتينگىنىڭ كوشباسشىلارىنىڭ وندىعىنا ماسساچۋسەتس تەحنولوگيالىق ينستيتۋتى، كەمبريدج ۋنيۆەرسيتەتى، ستەنفورد ۋنيۆەرسيتەتى، وكسفورد ۋنيۆەرسيتەتى، گارۆارد ۋنيۆەرسيتەتى جانە ت.ب. الەمدىك ۋنيۆەرسيتەتتەر كىردى.

ۋنيۆەرسيتەتتەردى حالىقارالىق دەڭگەيدە باعالاۋ ادىستەمەسى مىناداي ينديكاتورلار بويىنشا جۇزەگە اسىرىلادى: اكادەميالىق ساراپشىلار اراسىنداعى بەدەل، جۇمىس بەرۋشىلەر اراسىنداعى بەدەل، ءبىلىم الۋشىلاردىڭ پروفەسسورلىق-وقىتۋشىلىق قۇرامعا ارا قاتىناسى، دايەكسوز كەلتىرۋ، شەتەلدىك ءبىلىم الۋشىلار، جۇمىسقا ورنالاسۋ ناتيجەلەرى. سونداي-اق بيىل «جۇمىسپەن قامتۋ ناتيجەلەرى» جانە «حالىقارالىق زەرتتەۋ ىنتىماقتاستىعى» اتتى ەكى جاڭا ينديكاتور قوسىلدى.

ايتا كەتسەك، بيىل ەۋرازيا ۇلتتىق ۋنيۆەرسيتەتى QS World University Rankings by Subject 2022 پاندىك رەيتينگىسىندەگى دە پوزيتسياسىن جاقسارتتى. ەۇۋ الەمدىك تىزىمدەگى وكىلدىگىن 4-تەن 11-گە دەيىن كەڭەيتتى جانە قازاقستاندىق جوو اراسىندا 3 ءپان بويىنشا كوش باستاپ كەلەدى. بۇل رەتتە «قوناق ءۇي بيزنەسى جانە بوس ۋاقىتتى باسقارۋ» ءپانى الەمدىك رەيتينگتىڭ العاشقى جۇزدىگىنە كىردى، «لينگۆيستيكا» 251-300 توبىنان 101-150-گە تىزىمىنە اۋىستى.

ۇقساس جاڭالىقتار

Back to top button