توقاەۆ ساۋد ارابياسىنىڭ سىرتقى ىستەر مينيسترىمەن پىكىر الماستى

مەملەكەت باسشىسى قازاقستانعا رەسمي ساپارمەن كەلگەن ساۋد ارابياسى كورولدىگىنىڭ سىرتقى ىستەر ءمينيسترى فەيسال بەن فارحان ءال ساۋدتى قابىلدادى دەپ حابارلادى turkystan.kz اقورداعا سىلتەمە جاساپ.

كەزدەسۋ بارىسىندا ساياسي، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتى نىعايتۋعا باسا ءمان بەرە وتىرىپ، قازاقستان مەن ساۋد ارابياسى اراسىنداعى قاتىناستاردى دامىتۋدىڭ پەرسپەكتيۆالارى تالقىلاندى.

مەملەكەت باسشىسى كورولدىكتىڭ سىرتقى ساياسي ۆەدومستۆو باسشىسىنا ءىلتيپات بىلدىرە وتىرىپ، ونىڭ بۇل ساپارى ەلىمىزدىڭ تاريحىنداعى بەتبۇرىستى ساتپەن – جالپىۇلتتىق رەفەرەندۋممەن تۇسپا-تۇس كەلگەنىن اتاپ ءوتتى. اتالعان اسا ماڭىزدى شارانىڭ قورىتىندىسى جاڭا قازاقستان قۇرۋعا كىرىسۋگە مۇمكىندىك بەرەدى.

قاسىم-جومارت توقاەۆ ساۋد ارابياسى قازاقستاننىڭ اراب جانە يسلام الەمىندەگى باستى سەرىكتەسىنىڭ ءبىرى ەكەنىن اتاپ ءوتتى.

– ەلدەرىمىز ورتاق قۇندىلىقتارعا نەگىزدەلگەن ساياسي ديالوگتى دوستىق پەن ءوزارا سەنىم رۋحىندا دايەكتى تۇردە دامىتا بەرەدى. ەكى قاسيەتتىنىڭ ساقتاۋشىسى كورول سالمان بەن ابدەل ازيزبەن جانە تاق مۇراگەرى مۇحاممەد بەن سالمانمەن اراداعى تابىستى ىنتىماقتاستىقتى ودان ءارى جالعاستىرۋعا دايىن ەكەنىمىزدى بىلدىرەمىن، – دەدى پرەزيدەنت.

قاسىم-جومارت توقاەۆ اۋىل شارۋاشىلىعى، مۇناي حيمياسى، تۋريزم، تاۋ-كەن مەتاللۋرگياسى جانە قارجى سالالارىنداعى بىرلەسكەن جوبالاردى جۇزەگە اسىرۋ ءۇشىن قولايلى ينۆەستيتسيالىق مۇمكىندىكتەردىڭ بار ەكەنىنە نازار اۋداردى.

بۇل رەتتە مەملەكەت باسشىسى قازاقستان مەن ساۋد ارابياسىنىڭ ۇكىمەتارالىق كوميسسياسى مەن ىسكەرلىك كەڭەستىڭ جۇمىسىن جانداندىرۋ ماڭىزدى ەكەنىنە توقتالدى. سونداي-اق ءتيىستى كەلىسسوزدەردى جۇرگىزۋ ءۇشىن وكىلەتتى ۇكىمەتتىك دەلەگاتسيانى ەر-ريادقا جىبەرۋگە دايىن ەكەنىن ايتتى.

بۇدان بولەك، مەملەكەت باسشىسى مەككە مەن مەدينەدە قازاقستاندىق قاجىلارعا قاجەتتى جاعداي جاسالاتىنى جانە ءداستۇرلى قوناقجايلىق كورسەتىلەتىنى ءۇشىن كورولدىكتىڭ باسشىلىعىنا ريزاشىلىعىن ءبىلدىردى.

فەيسال بەن فارحان ءال ساۋد ساۋد ارابياسى كورولى مەن تاق مۇراگەرىنىڭ پرەزيدەنت قاسىم-جومارت توقاەۆقا جانە قازاقستان حالقىنا جولداعان سالەمىن جەتكىزدى.

مينيستر ەكى مەملەكەت اراسىنداعى قارىم-قاتىناستاردىڭ دايەكتى تۇردە دامىپ كەلە جاتقانىن اتاپ ءوتتى. سونداي-اق كورولدىك باسشىلىعىنىڭ ديپلوماتيالىق بايلانىستار ورناعاننان بەرگى جان-جاقتى ىنتىماقتاستىق باعىتتاعى جەتىستىكتەردى جوعارى باعالايتىنىن ايتتى.

ساۋديالىق ديپلومات قازاقستان پرەزيدەنتىن ەلىمىزدە رەفەرەندۋمنىڭ تابىستى وتۋىمەن قۇتتىقتادى.

– ساۋد ارابياسى كورولدىگى ءسىزدىڭ باسشىلىعىڭىزبەن ەكىنشى رەسپۋبليكانى قۇرۋ ىسىندە جانە قازاقستاننىڭ ودان ءارى وركەندەۋىنە باعىتتالعان اۋقىمدى رەفورمالاردى جۇزەگە اسىرۋدى جالعاستىرۋدا تابىس تىلەيدى، – دەدى مينيستر.

فەيسال بەن فارحان ءال ساۋد ساۋدا-ەكونوميكالىق جانە ينۆەستيتسيالىق ىقپالداستىقتى نىعايتۋدىڭ پەرسپەكتيۆالارىن ەگجەي-تەگجەيلى تالقىلاۋ ءۇشىن قازاقستاندىق سەرىكتەستەرمەن كەزدەسۋ ۇيىمداستىرۋعا ساۋديا  تاراپى دايىن ەكەنىن جەتكىزدى. بۇل جۋىق ارادا قازاقستاندا جوعارى دەڭگەيدەگى كەزدەسۋ وتكىزۋ ءۇشىن بەرىك نەگىز بولادى.

سونىمەن قاتار كەزدەسۋدە ولار حالىقارالىق كۇن ءتارتىبىنىڭ وزەكتى ماسەلەلەرى جونىندە پىكىر الماستى.

اڭگىمەلەسۋ سوڭىندا قاسىم-جومارت توقاەۆ كورول سالمان بەن ابدەل ازيزگە جانە تاق مۇراگەرى مۇحاممەد بەن سالمان ءال ساۋدقا جۇرەكجاردى سالەمىن جولدادى.

ۇقساس جاڭالىقتار

Back to top button