مەملەكەت باسشىسى ىشكى ىستەر ءمينيسترىن قابىلدادى

مەملەكەت باسشىسى ىشكى ىستەر ءمينيسترى مارات احمەتجانوۆتى قابىلدادى دەپ حابارلادى turkystan.kz اقورداعا سىلتەمە جاساپ.

پرەزيدەنتكە ەلىمىزدەگى كريمينوگەندىك جاعدايدىڭ جاي-كۇيى تۋرالى ەسەپ بەرىلدى. قاسىم-جومارت توقاەۆقا قاراقشىلىق، مال ۇرلىعى، الاياقتىق، ونىڭ ىشىندە ينتەرنەت الاياقتىعى، سونداي-اق بۇرىن سوتتالعانداردىڭ ماس كۇيىندە، وتباسىلىق-تۇرمىستىق سالادا جانە توپتاسىپ جاساعان قىلمىستارىنىڭ سانى ايتارلىقتاي تومەندەگەنى تۋرالى باياندالدى.

مينيستر مەملەكەت باسشىسىنا ۇيىمداسقان قىلمىس پەن ەسىرتكى بيزنەسىنە قارسى ءىس-قيمىل جونىندە قابىلدانىپ جاتقان شارالار تۋرالى مالىمەت بەردى.

پرەزيدەنت كامەلەتكە تولماعاندارعا قاتىستى جانە وتباسىلىق-تۇرمىستىق سالاداعى قىلمىستىڭ الدىن الۋ جۇمىستارىنىڭ ناتيجەلەرىمەن تانىستى.

مارات احمەتجانوۆ قاسىم-جومارت توقاەۆقا ىشكى ىستەر ورگاندارىنىڭ قىزمەتىن بيۋروكراتيادان ارىلتۋ، جۇمىس ۇدەرىستەرىن تسيفرلاندىرۋ جانە اۆتوماتتاندىرۋ، ىشكى راسىمدەردى، سونىڭ ىشىندە مەملەكەتتىك قىزمەت كورسەتۋ سالاسىن وڭتايلاندىرۋ جونىندە باياندادى.

مەملەكەت باسشىسىنا كريمينوگەندىك جاعدايعا مونيتورينگ جاسايتىن ءىىم احۋالدىق تالداۋ ورتالىعىنىڭ مۇمكىندىكتەرىن كەڭەيتۋ تۋرالى اقپارات بەرىلدى.

سونىمەن قاتار پرەزيدەنتكە جول قوزعالىسى ەرەجەلەرىن قاساقانا بۇزاتىنداردى انىقتاۋعا باعىتتالعان جاڭا جۇيە جۇمىسىنىڭ الدىن الا ناتيجەلەرى تۋرالى ايتىلدى.

كەزدەسۋ سوڭىندا مەملەكەت باسشىسى مينيسترگە ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە بىرقاتار تاپسىرما بەردى. وسى رەتتە ينتەرنەت الاياقتىعى مەن قارجى پيراميدالارىنا قارسى ءىس-قيمىل جونىندەگى شارالاردى جانداندىرۋ قاجەتتىگى اتاپ ءوتىلدى.

ۇقساس جاڭالىقتار

Back to top button