الماتىدا شومىلۋعا رۇقسات ەتىلگەن ورىندار ءتىزىمى جاسالدى

الماتى قالالىق توتەنشە جاعدايلار دەپارتامەنتى ازاماتتىق قورعانىس باسقارماسىنىڭ باسشىسى يسحار ساۆازوۆ شومىلۋعا رۇقسات ەتىلگەن ورىنداردىڭ انىقتالعانىن ايتتى دەپ حابارلادى turkystan.kz.

ونىڭ ايتۋىنشا، الماتى اۋماعىندا شومىلۋعا رۇقسات ەتىلگەن 4 ورىن بەلگىلەنگەن.

«ولار – سايران كولى (الماتى اۋدانى جاعىندا، تولە بي كوشەسىنەن 200 مەتر جەردە); سايران كولىنىڭ باتىس جاعى (اۋەزوۆ اۋدانى جاعىندا، تولە بي كوشەسىنە قاراما-قارسى 300 مەتر جەردە); «باۋم باعى» ماڭىنداعى د. قوناەۆ اتىنداعى ۇلكەن الماتى كانالىنىڭ بويى; گۇلدەر دەمالىس ايماعى. وسى 4 سۋ قويماسىنان باسقا ەسەنتاي، كىشى الماتى وزەندەرى سياقتى تاۋ وزەندەرىندە سۋعا تۇسۋگە تىيىم سالىنادى»، – دەدى يسحار ساۆازوۆ.

سونداي-اق ول سۋدا بولاتىن توتەنشە جاعدايلاردىڭ الدىن الۋ ءۇشىن بىرقاتار قاۋىپسىزدىك ەرەجەسىن ساقتاۋدى سۇرادى.

رۇقسات ەتىلمەگەن جەرگە شومىلۋعا، جۇزە بىلمەيتىن ادامعا سۋعا تۇسۋگە، جاعالاۋدان الىسقا كەتۋگە، بالالاردى ەرەسەكتەردىڭ قاراۋىنسىز قالدىرۋعا، تۇندە ءارى ماس كۇيىندە سۋعا تۇسۋگە تىيىم سالىنادى.

«5 ادامنان تۇراتىن قۇتقارۋ قىزمەتى جاعالاۋلاردا تاۋلىك بويى كەزەكشىلىك ەتەدى. ولار قاجەتتى قۇرال-جابدىقتارمەن قامتاماسىز ەتىلگەن. رەيد شارالارى سۋعا تۇسۋگە رۇقسات ەتىلگەن جەرلەردە عانا ەمەس، تىيىم سالىنعان جەرلەردە دە وتكىزىلىپ جاتىر. دروندار حالىقتى اقپاراتتاندىرۋ ءۇشىن دە قولدانىلادى»، – دەيدى سپيكەر.

ۇقساس جاڭالىقتار

Back to top button